बुधबार, कार्तिक ५ २०७७
काठमाडौं १०:०४
वासिङटन डिसी 00:19

टर्किस एयरको जहाज धावनमार्गबाट हटाइयो

इनेप्लिज २०७१ फागुन २३ गते १५:२८ मा प्रकाशित

Rss_Images_1425727804123_Pro_Ktm_ Airport ma Tuirkash Air (2)काठमाडौँ, २३ । त्रिभुवन अन्तर्राष्ट्रिय विमानस्थलमा दुर्घटनाग्रस्त टर्किस एयरको विमानलाई चारदिनको अनवरत प्रयासपछि पार्किङस्थलमा पुर्‍याइएको छ ।

अवरुद्ध विमानस्थललाई चारदिनको प्रयासपछि जहाजलाई धस्सिएको स्थानबाट आज साँझ पार्किङस्थल नजिक पुर्‍याइएको हो । मुलुकको एकमात्र अन्तर्राष्ट्रिय विमानस्थल चारदिन अर्थात करिब ८० घन्टा बढी अवरुद्ध भएको छ । विमानस्थलका प्रबन्धक पूर्णप्रसाद चुडालकाअनुसार विमानस्थल आजै ७ः३० बजेबाट सञ्चालनमा आउनेछ । टर्किस एयर दुर्घटनाका कारण बिग्रिएको बत्ती मर्मत गरिएको र दुर्घटनास्थलसमेत सफाई गरिएको छ ।

उहाँले धावनमार्गमा रहेका सबै अवरोध हटाइएकाले केहीबेरमै विमानस्थल सञ्चालनमा आउने जानकारी दिनुभयो । टर्किस एयरको जहाजलाई आन्तरिक विमानस्थल नजिक पु¥याइएको र आइतबार पूर्णरुपमा पार्किङस्थलमा लगिने र मर्मतको काम हुने बताइएको छ ।

विमानस्थलका अनुसार आजसम्म २४ हजार ३०० यात्रु तयारी अवस्थामा छन् भने त्यत्तिकै सङ्ख्यामा विभिन्न मुलुकका विमानस्थलबाट यात्रुहरु काठमाडौँ आउने तयारीमा छन् । नागरिक उड्डयन प्राधिकरणका महानिर्देशक रतिशचन्द्रलाल सुमनले विमानस्थल अवरुद्ध हुँदा बढेको यात्रुको चापलाई व्यवस्थित र सहज बनाउन विमानस्थल सञ्चालनमा आएपछि २४ सै घन्टा खुला गर्न लागिएको बताउनुभयो ।

उहाँले अवरुद्ध बनेको दिनसम्मको अवधि २४ सै घन्टा खुलाउने र सञ्चालन समयपछिका उडान नियमित हुने तर त्यसअघिका उडान डिले हुने जानकारी दिनुभयो ।

टर्किस एयरको जहाजलाई आज बिहान करिब ९ बजे धस्सिएको स्थानबाट करिब १५० मिटर तानेर मुख्य धावनमार्गमा लगिएको थियो । त्यहाँदेखि विमानस्थलको पूर्वपट्टिको हेलिप्याडतर्फको पार्किङसम्म पु¥याउन छ÷सातसय मिटर दूरीमा तान्ने क्रममा गति असन्तुलन भएर विमान अड्किएपछि विमानस्थल साँझ ६ बजेसम्मका लागि बन्द गरिएको थियो ।

“रातभरीको प्रयासपछि विहान ३ बजे जहाज उठाएर पौने ९ बजे खाल्डोबाट निकाल्न सफल भयौँ ”–महानिर्देशक सुमनले भन्नुभयो ।

जहाज तान्न भारतका २५ जनाको विज्ञ टोली, नेपाली सेनाका ४०० जवान, विमानस्थलमा तैनाथ नेपाल प्रहरीका ३६० प्रहरी जवान तथा प्राधिकरण, धावनमार्ग विस्तार गरिरहेको ठेकेदार कम्पनीका सयजना र तीभन्दा बाहिरका सय जनाले २४ सै घन्टा काम गरेको र करिब २२ वटा उपकरण, सडक विभाग, काठमाडौँ उपत्यकाका ट्रक तथा सडक विभाग र रिङरोडका क्रेनसमेत तैनाथ राखिएको विमानस्थलले जनाएको छ ।

शुक्रबारै जहाजलाई ब्लाडरमार्फत उठाइएको भए पनि उचाइ कम हुँदा चक्का फेर्न र ग्राभेल रोल गर्न मिलेको थिएन । विमानको नोज गियर (अगाडिको चक्का) शुक्रबार नै ३० टनको ट्रेलरमा राखिसकिएको थियो ।

फलामको पाता र ग्राभेल राखेर बाटो मजबुत बनाइ जहाजलाई धावनमार्गमा ल्याइएको थियो । जहाजमा रहेको १७ टन इन्धन भने प्राविधिक कारणले ननिकालिएको महानिर्देशक सुमनले जानकारी दिनुभयो ।

अन्तर्राष्ट्रिय विमानस्थल बन्द हुँदा हजारौ यात्रु अलपत्र परेका छन् । काठमाडौँबाट विभिन्न मुलुक जाने र ती मुलुकबाट आउने यात्रुहरु अलपत्र अवस्थामा छन्

विमानस्थलमा दैनिक ४० वटा अन्तर्राष्ट्रिय उडान हुने र सोही सङ्ख्यामा अवतरण हुने हुँदा औषतमा दैनिक रु एक करोड बढी घाटा हुने नागरिक उड्डयन प्राधिकरणले जनाएको छ ।

प्रतिक्रिया