मंगलबार, असोज १२ २०७८
काठमाडौं ००:२३
वासिङटन डिसी 14:38

प्रजातन्त्र जोगाउन लोकतान्त्रिक गठबन्धन–अध्यक्ष राणा

इनेप्लिज २०७४ मंसिर १४ गते १२:५९ मा प्रकाशित

भक्तपुर, १४ मंसिर : राष्ट्रिय प्रजातन्त्र पार्टी (प्रजातान्त्रिक) का अध्यक्ष पशुपति शमशेर राणाले प्रजातन्त्र जोगाउन लोकतान्त्रिक गठबन्धन खडा भएको बताउनुभएको छ ।

आज भक्तपुरमा आयोजना भएको लोकतान्त्रिक गठबन्धनको युवा भेलामा उहाँले भन्नुभयो –“मुलुकले वाम गठबन्धन सहन नसक्ने भएकाले पनि लोकतान्त्रिक गठबन्धन बनाउनु परेको हो ।”

अध्यक्ष राणाले भन्नुभयो, “वाम गठबन्धन विजयी भएमा मुलुकमा एकदलीय अधिनायकवाद आउँछ, वाम गठबन्धनलाई मुलुकले थेग्न पनि सक्दैन, त्यसैले प्रजातन्त्र जोगाउन लोकतान्त्रिक गठबन्धन खडा गर्नुपरेको हो ।”

विगतका वर्षमा नौ महिनामा सरकार ढाल्ने प्रवृत्तिको अन्त्य गरी देशलाई स्थिर सरकार दिन्छौँ भनेर आएकाले लोकतान्त्रिक गठबन्धनलाई विजयी बनाउनुपर्नेमा जोड दिदैं उहाँले राप्रपा (प्रजातान्त्रिक) ले प्रत्यक्ष उम्मेदवारतर्फ नेपाली काँग्रेसलाई सम्पूर्ण भोट दिने तर त्यसको बदलामा काँग्रेसले समानुपातिकको भोट सबै आफ्नो पार्टीलाई दिनुपर्ने बताउनुभयो ।

अध्यक्ष राणाले भन्नुभयो, “काँग्रेस ठूलो पार्टी छ, आफँै राष्ट्रिय पार्टी हुन्छ तर हाम्रो पार्टीलाई राष्ट्रिय पार्टी बनाएर अस्तित्व जोगाउनका लागि काँग्रेसका सबैले समानुपातिकमा राप्रपा प्रजातान्त्रिकलाई भोट दिनुस्, हाम्रो यही शर्त छ ।”

कार्यक्रममा राप्रपा प्रजातान्त्रिकका केन्द्रीय सदस्य रवीन्द्रप्रताप शाह र सुरेन्द्र केसीले लोकतान्त्रिक गठबन्धनले देशव्यापी विजयी हासिल गर्दै सरकार बनाउने विश्वास व्यक्त गर्नुभयो ।

कार्यक्रममा काँग्रेस भक्तपुरका अध्यक्ष दूर्लभ थापा, काँग्रेस नेता कृष्णलाल भँडेल, महिला संघकी अध्यक्ष सरु बानियाँ, क्षेत्र नं १ का उम्मेदवार बाबुराजा जोशी र क्षेत्र नं १ प्रदेशसभा सदस्य (क) का उम्मेदवार जीवन खत्रीले काँग्रेसको जित सुनिश्चित रहेको बताउनुभयो ।

प्रतिक्रिया