अमेरिकी राष्ट्रपति डोनाल्ड ट्रम्पले सॅघिय रिजर्भ (केन्द्रीय बैंक) प्रमुख जेरोम पावलमाथि अमेरिकी कंग्रेसले अनुसन्धान गर्न तयार रहेको बताएका छन्। 

उनले पावलप्रति कडा असन्तुष्टि व्यक्त गर्दै भने, “उनी एकदमै खराब छन्।” ट्रम्पले पावलले कंग्रेससँग झूट बोलेको आरोपसहित उनले राजीनामा दिनुपर्ने माग गरे।

मंगलवारको मन्त्रिपरिषद बैठकमा पत्रकारले सोधेको प्रश्नमा ट्रम्पले पावलमाथि छानबिन हुन सक्ने संकेत दिए। 

ट्रम्पले ब्याजदर घटाउन पटक–पटक दबाब दिँदै आएका छन् ।

तर, पावलले राष्ट्रपति ट्रम्पको व्यापार करको प्रभाव राम्रोसँग बुझिएपछि मात्र दर घटाउने निर्णय लिने बताएका छन्।

त्यही बैठकमा ट्रम्पले युक्रेन युद्धको सन्दर्भमा रूसी राष्ट्रपति भ्लादिमिर पुटिनबारे पनि गम्भीर टिप्पणी गरे ।

पुटिनले धेरै मान्छे मार्दै छन् र उनले आफ्ना सैनिक र युक्रेनी सैनिकहरू पनि मारेको आरोप लगाए ।

पत्रकारले केही गर्ने सोचमा हुनुहुन्छ भनेर सोध्दा ट्रम्पले भने, “म तपाईहरुलाई अहिले भन्दिन।” उनले थपे, “यो लडाईपहिले सोचिएभन्दा धेरै गाह्रो भएको छ।”