अफगान गृहमन्त्रालयले बिहीबार प्रकाशन गरेको विज्ञप्तिमा सो जानकारी दिएको छ । अफगानिस्तानबाट नेटो सैनिकले तालिवानसँगको युद्धमा भाग नलिने भनी विदा लिएको भए पनि दिनहुँजसो त्यहाँको सुरक्षाबलले आतङ्ककारीविरुद्ध कारबाही जारी राखेका छन् ।

अफगान राष्ट्रिय सेनाले अफगानिस्तानका विभिन्न प्रान्तमा तालिवानविरुद्ध बुधबार बिहानबाट बिहीबार बिहानसम्म जारी राखेको कारबाहीमा परी कम्तीमा ३७ तालिवानी मारिनुका साथै अन्य ३७ नै घाइते भएका मन्त्रालयद्वारा जारी विज्ञप्तिमा जनाइएको छ ।

त्यसैगरी सो आक्रमणका क्रममा अन्य दुई आतङ्ककारी पक्राउ परेको जनाइएको । यस कारबाहीको तालिवान आतङ्ककारीहरुले भने केही टिप्पणी गरेका छैनन् ।

सो कारबाहीका क्रममा आठ अफगान सेनाले पनि ज्यान गुमाएका जारी विज्ञप्तिमा जनाइएको छ ।

केही दिनयता भएको तालिवानविरुद्धको कारबाहीका क्रममा त्यहाँको प्रहरीलाई सफलता प्राप्त भइरहेको पनि अधिकारीहरूले जनाएका छन् ।

तर हालैका दिनहरुमा अफगान सुरक्षाबल र नेटो सैनिकलाई समेत लक्ष्यगरी गर्ने तालिवान आतङ्ककारीले गर्ने गरेका आक्रमणहरुमा सुरक्षाबल र सर्वसाधारणको ज्यान जाने क्रम बढदै गएको छ ।

अफगानिस्तानमा सन् २०१५ को पहिलो ६ महिनाभित्रमा भएका सशस्त्र द्वन्द्व र युद्धमा परी एक हजार ५९२ सर्वसाधारणको ज्यान गएको अफगानिस्तानका लागि संयुक्त राष्ट्रसङ्घीय मिसनले गत हप्ता प्रकाशन गरेको प्रतिवेदनमा जनाएको थियो ।

अफगानिस्तानमा सन् २००९ को जनवरी १ बाट सन् २०१५ को जुनसम्म १९ हजार ३६० जनाभन्दा बढी नागरिक हताहत हुनुका साथै अन्य ३३ हजारभन्दा बढी घाइते भएको पनि सो प्रतिवेदनमा जनाइएको थियो ।