रु ११ करोडको लागतमा बैतडी सदरमुकामस्थित सुन्दरखालीको दशरथ चन्द क्रिकेट मैदानको स्तरोन्नति गरेर सुविधासम्पन्न ‘दशरथ चन्द क्रिकेट स्टेडियम’ निर्माण सुरु भएको हो । खेलमैदान, दर्शकदीर्घा, पोसाक परिवर्तन कक्ष, प्रशासकीय भवन, व्यायाम र अभ्यास कक्षसहितको सुविधासम्पन्न खेलमैदान बनाउने योजनासहित निर्माण थालिएको छ । तीन महिनाभित्र दुई मि अग्लो पर्खाल तथा सम्याउनेलगायत काम हुने क्षेत्र नं ६ बैतडीका कावा अध्यक्ष विनोद चन्दले बताउनुभयो ।

तीन वर्षभित्र क्रिकेट मैदान सम्पन्न गरिने बताइएको छ । भौतिक पूर्वाधार र प्रशिक्षण नपुग्दा स्तरीय क्रिकेट खेल्न र राष्ट्रियस्तरका प्रतियोगिता गराउन नसक्दा बैतडीका खेलाडी समस्यामा थिए । मैदान अभावमा प्रतियोगिता सम्पन्न गर्न कठिनाइ भइरहेको अवस्थामा सरकारले खेलमैदान निर्माणका लागि बजेट विनियोजन गरेपछि यहाँका क्रिकेट खेलाडी उत्साहित भएका छन् । खेलमैदान निर्माणपछि भारतसँग सीमा जोडिएको सो ठाउँमा भारतका खेलाडी आउन सक्ने र खेलको स्तरसमेत बढ्न सक्ने क्षेत्र नं ६ का सचिव तेजप्रकाश भट्टले बताउनुभयो ।