उहाँका लागि यो काम गर्न छ वर्ष छ महिना लाग्यो ।

‘लेक एरिया टेक्निकल इन्स्टिच्युट’ मा सम्बोधन गर्दै राष्ट्रपति ओबामाले आफू यहाँ आइपुग्दा निकै खुसी भएको बताउनुभयो । उहाँले यहाँ पनि निःशुल्क सामुदायिक कलेजको प्रस्तावका बारेमा बोल्नुभयो । उहाँले अब आफू राष्ट्रपतिको रूपमा सबै राज्यमा पुगेको बताउँदै अन्त्यका लागि सबैभन्दा राम्रो राज्यलाई राखेको बताउनुभयो ।

राष्ट्रपति ओबामा अमेरिकाका प्रत्येक राज्यको भ्रमण गर्ने चौँथो राष्ट्रपति बन्नुभएको छ ।

लेक एरिया टेक्निकल इन्स्टिच्युट अमेरिकामा दुई वर्षीय स्नातकका लागि विद्यार्थी तयार गर्ने प्रमुख सामुदायिक कलेजमध्ये एक हो । राष्ट्रपति ओबामाले १२ कक्षा सम्मको शिक्षा सबैका लागि उपलब्ध भएझै सामुदायिक कलेजको शिक्षा पनि सबैका लागि उपलब्ध हुनुपर्ने बताउनुभयो ।

उहाँले मुलुकको रूपमा अमेरिकाले आफूलाई अगाडि बढाउन शिक्षा आवश्यक पर्ने र त्यसका लागि प्रयास गर्ने व्यक्तिबाट मूल्य लिने मुलुक बनाउन नहुने बताउनुभयो ।

राष्ट्रपति ओबामाले आफ्नो आरम्भको वर्षमा ४६ राज्यको भ्रमण गर्नुभएको थियो र बाँकी चार रिपब्लिकन राज्यलाई पछि भ्रमण गर्ने राज्यको रूपमा राख्नुभएको थियो । उहाँले युटाह, आईदाहो तथा साउथ क्यारोलिनाको भ्रमण पनि सक्याउनुभएको छ ।

शुक्रबार साउथ डकोटा आउनुअगाडि राष्ट्रपति ओबामा यहाँ आउनुभएको थियो तर त्यो सन् २००८ अगाडि राष्ट्रपति पदका लागि प्रचार प्रसारका लागि । गत वर्ष उहाँ साउथ डकोटाको छिमेकी नर्थ डकोटा आउनुभएको थियो । आफ्नो कार्यकालमा सबै राज्यको भ्रमण गर्ने अर्का राष्ट्रपति बिल क्लिन्टन हुनुहुन्थ्यो ।