सोमबार, कार्तिक १० २०७७
काठमाडौं १२:०३
वासिङटन डिसी 02:18

कीर्तिमानी तेक्वान्दो खेलाडी दीपक विष्टबाट सन्यास घोषणा

इनेप्लिज २०७१ माघ १७ गते १५:२२ मा प्रकाशित

dipak-bistaकाठमाडौँ, १७ माघ । दक्षिण एसियाका कीर्तिमानी तेक्वान्दो खेलाडी दीपक विष्टले खेलबाट सन्यास लिने घोषणा गर्नुभएको छ ।

तेक्वान्दो रिङमा प्रतिस्पर्धा गर्न छाडेको करिब पाँच वर्षपछि  विष्टले आज यहाँ आयोजित कार्यक्रममा तेक्वान्दोबाट सन्यास लिएको औपचारिक घोषणा गर्नुभएको हो । २८ वर्षीय विष्टले दक्षिण एसियाली साग खेलकुदको पहिल्लो चार संस्करणमा लगातार स्वर्ण पदक जित्नुभएको थियो ।

विष्टले सन् १९९९ मा काठमाडौँमा आयोजित आठौँ, सन् २००४ मा पाकिस्तानमा आयोजित नवौँ र सन् २००६ मा श्रीलङ्कामा आयोजित ११ औँ लगायतका साग स्वर्ण पदक जित्नुभएको थियो ।

कार्यक्रममा विष्टलाई सरकार, विभिन्न सङ्घ/संस्था तथा शुभचिन्तकले संयुक्त रुपमा भक्सवागनको पोलो गाडी (कार) उपहार समेत दिएका छन् । सरकारले सो गाडीका लागि भन्सार मिनाहा गरिदिएको छ ।

त्यसैगरी, विष्टका शुभचिन्तक सुनिल कटुवालले विष्टलाई रु एक लाख नगद प्रदान गर्नुभयो । दन्त चिकित्सक राजेन्द्र भट्टले मायाको चिनो प्रदान गर्दै विष्टलाई आजीवन निःशुल्क दन्त परीक्षण गर्ने घोषणा गर्नुभयो ।

विष्टले खेलकुदको क्षेत्रमा पुर्‍याएको योगदानका लागि धन्यवाद र आगामी जीवनको प्रगतिको कामना गर्दै प्रधानमन्त्री सुशील कोइरालाले पठाउनुभएको शुभकामना सन्देश कार्यक्रममा वाचन गरिएको थियो ।

कार्यक्रममा वाणिज्य तथा आपूर्तिमन्त्री सुनिलबहादुर थापाले व्यक्तिगत र पार्टीगत स्वार्थमा केन्द्रित भएर खेलकुद क्षेत्रमा कुनै पनि किसिमको राजनीति नगर्न आग्रह गर्नुभयो ।

युवा नेता तथा सभासद् गगन थापाले राज्य र सरकारले खेलकुदलाई अहिले पनि सामान्य रुपमा लिएको हुँदा समग्र खेलकुदको बारेमा बहस गरिनुपर्ने आवश्यकता औँल्याउनुभयो ।

राष्ट्रिय खेलकुल परिषद्का सदस्य सचिव युुवराज लामाले खेलकुललाई आगामी संविधानमा मौलिक अधिकारभित्र सुनिश्चित गरिनुपर्ने माग गर्नुभयो । सोही अवसरमा तेक्वान्दो खेलबाट सन्यास लिएका विष्टले तेक्वान्दो खेलबाट सन्यास लिएपनि बाँकी जीवन सोही क्षेत्रमा अभिभावकको भूमिका निर्वाह गर्ने जानकारी दिनुभयो ।

प्रतिक्रिया