नवलपरासीमा अन्तर्राष्ट्रिय विराट कुस्ती (दंगल) प्रतियोगिता

परासी, १० माघ । नवलपरासीमा आगामी माघ १६ गतेबाट सञ्चालन हुने अन्तर्राष्ट्रिय विराट कुस्ती (दंगल) प्रतियोगिताको तयारी पूरा भएको छ ।

नवलपरासीको सेमरीमा आज आयोजित पत्रकार सम्मेलनमा कुस्ती प्रतियोगिताको सम्पूर्ण तयारी पूरा भएको आयोजक समितिले जानकारी दिएको छ ।

सो प्रतियोगितामा महिला र पुरुषका लागि फरक–फरक प्रतिस्पर्धा गराइने छ ।  प्रतियोगितामा नेपाल र भारतका करिब ५०० बढी महिला तथा पुरुष पहलवानहरुको सहभागिता रहने छ ।

प्रतियोगितामा प्रथम हुने पहलवानलाई रु एक लाख, दोस्रो हुनेलाई रु ५० हजार र तेस्रो हुनेलाई रु २५ हजार पुरस्कार प्रदान गरिने दंगल प्रतियोगिताको मूल समितिका संयोजक रामभवन यादवले  जानकारी दिनुभयो ।

तीन दिन चल्ने  प्रतियोगितामा सहभागी हुने पहलवानहरुलाई निःशुल्क सहभागी गराउने जानकारी दिइएको छ ।

प्रतियोगितामा भारतको उत्तर प्रदेश, विहार, मध्यमाञ्चल, अयोध्या, लखनउ, दिल्ली, महाराष्ट्र र नेपालको पोखरा, बारा, पर्सा, वीरगन्ज रुपन्देही, कपिलवस्तु नवलपरासीलगायतका पहलवानहरुको सहभागिता हुने आयोजकले जानकारी दिएको छ ।