राप्रपा नेपालको संविधानप्रतिको चिन्ता

काठमाडौँ, ३० पुस ।  राष्ट्रिय प्रजातन्त्र पार्टी नेपालले माघ ८ गतेभित्र संविधान जारी गर्न नसक्ने हो भने सहमति हुन नसकेका विषय धर्मनिरपेक्षता, गणतन्त्र र सङ्घीयताबारे जनमत सङ्ग्रह गरिनुपर्ने आवश्यकतामा जोड दिएको छ ।

पार्टीको केन्द्रीय कार्यसमितिको बैठकको निर्णय सार्वजनिक गर्न आज आयोजित पत्रकार सम्मेलनमा अध्यक्ष कमल थापाले नेपाली जनताको चाहना तथा राजनीतिक दलहरुको सामूहिक प्रतिबद्धताका बाबजुद माघ ८ गतेभित्र संविधान नबन्ने अवस्था सिर्जना भएको प्रति चिन्ता व्यक्त गर्नुभयो ।

निर्धारित समयभित्र संविधान बन्न नसक्नुमा नेपाली काँग्रेस, नेकपा(एमाले), एकीकृत नेकपा(माओवादी) र मधेसवादी दल जिम्मेवार रहेको बताउँदै उहाँले  ठूला राजनीतिक दलका शीर्ष नेताको अकर्मण्यता, सत्तालिप्सा र असक्षमता नै संविधान नबन्नुको मूलकारण भएको आरोप लगाउनुभयो ।

फरक मान्यता र कार्यसूचीका बाबजुद पनि विधि र प्रक्रिया अनुसार गरिने निर्णय पार्टीले स्वीकार्दै आएको बताउँदै अध्यक्ष थापाले समयमा संविधान बन्न नसकेबाट सङ्क्रमणकाल अझै लम्बिने निश्चित भएको छ भन्नु भयो ।

नयाँ संविधानमा हिन्दुराष्ट्रको सुनिश्चितता, धर्मनिरपेक्षता, गणतन्त्र र सङ्घीयताबारे जनमत सङ्ग्रहका लागि दबाब दिन पहिलो चरणको जनसङ्घर्ष अन्तर्गत माघ ४ गते  देशको सम्पूर्ण जिल्ला सदरमुकाममा प्रदर्शन, र्‍याली तथा जनसभा आयोजना गर्ने सो पार्टीले जनाएको छ ।

बैठकले पार्टीले सञ्चालन गरेको मेची–महाकाली श्री पशुपतीनाथ रथयात्राको क्रममा आमजनताबाट प्राप्त अपार सद्भाव, सहयोग र समर्थनप्रति आभार प्रकट गरेको छ ।