काठमाडौं, १ पुस । अष्ट्रेलियाको सिड्नीस्थित एउटा क्याफेलाई बन्दुकधारीको नियन्त्रणबाट मुक्त गराउन प्रहरीले गरेको सशस्त्र कारवाहीमा ३ जनाको ज्यान गएको छ ।

सन् १९९६ देखि अष्ट्रेलियामा राजनीतिक शरण लिईरहेका ईरानी शरणार्थी मान हारोन मोनिसले हिजो बिहानैदेखी सिड्नीको व्यस्त मार्टिन प्लेसमा रहेको लिन्ड चकलेट क्याफेलाई नियन्त्रणमा लिएर १७ जनालाई बन्धक बनाएका थिए ।

१६ घण्टासम्म बन्दुकधारीलाई मनाएर आत्मसर्मपण गराउने प्रयास विफल भएपछि अष्ट्रेलियन कमाण्डोले सशस्त्र कारवाही गरेको थियो । कारवाहीको क्रममा बन्धक बनाइएका दुइ सर्वसाधारणसहित तीन जनाको मृत्यु भएको हो ।

प्रहरी कारवाहीमा बन्दुकधारी हारोन मोनिस मारिएका हुन् । बन्दुकधारीले मानव ढालको रुपमा प्रयोग गरेका क्याफेका ३४ वर्षिय म्यानेजर टोरी जोन्सन र ३८ वर्षीय वकिल कट्रिना डसनको समेत मृत्यु भएको हो ।

आफुलाई इस्लामी धर्मगुरु बताउने ती बन्दुकधारी विभिन्न आरोपमा अदालतको चक्कर काटिरहेको इरानी शरणार्थी थिए । उनीमाथि झण्डै ४० वटा विभिन्न आरोपमा मुद्दा चलिरहेको थियो । बन्धक प्रकरणबाट क्याफेलाई मुक्त गराउने क्रममा ती बन्दुकधारीले अष्ट्रेलियाका प्रधानमन्त्री टोनी एबटसँग सिधा वार्ता गर्ने प्रस्ताव राखेका थिए ।स्रोतः एजेन्सी