बिहीबार, मंसिर ११ २०७७
काठमाडौं १७:५९
वासिङटन डिसी 07:14

एमाओवादीको रवैयाले संविधान निर्माण लम्बियो: मन्त्री साउद

इनेप्लिज २०७१ चैत २२ गते १४:३६ मा प्रकाशित

14100807NP-saudदमक, २२ चैत । सिँचाइमन्त्री एनपी साउदले संविधान निर्माणका लागि एमाओवादी प्रतिबद्ध नभएकाले प्रक्रिया लम्बिँदै गएको बताउनुभएको छ ।

नेपाल प्रेस युनियन माईपश्चिम क्षेत्रीय समितिले आज बिहान दमकमा आयोजना गरेको अन्तरसंवाद कार्यक्रममा काँग्रेसका केन्द्रीय सदस्यसमेत रहनुभएका मन्त्री साउदले संविधानसभालाई अपमान गरेर सडकमा उफ्रँदै संविधान नबन्ने जिकिर गर्नुभयो ।

सडक आन्दोलन त्यागेर संविधान निर्माणमा जुट्न खाँचो रहेको औँल्याउँदै उहाँले एमाओवादीलगायतका विपक्षी मोर्चाले संविधान जारी गर्न आन्दोलन त्यागेर सहकार्यको पक्षमा स्पष्ट उभिन आग्रह गर्नुभयो । मन्त्री साउदले सहमति नभए प्रक्रियाबाट भए पनि जति छिटो संविधान जारी गरिनुपर्ने बताउनुभयो ।

एक फरक प्रसङ्गमा उहाँले झापामा सिँचाइ सेवालाई प्रभावकारी बनाउन सरकारले विशेष कार्यक्रम सञ्चालन गर्ने उल्लेख गर्नुभयो ।

यसैगरी मन्त्री साउदले दमकको रतुवा, मावाखोला र धरमपुरमा पर्ने कमल खोलाले गर्दै आएको कटान क्षेत्रको अवलोकन गर्नुभएको थियो । त्यस क्रममा मन्त्री साउदसँग खोला प्रभावित क्षेत्रका बासिन्दाले खोलाको दीर्घकालीन नियन्त्रण तथा सहज सिँचाइ सुविधालगायत माग राखेका थिए ।

प्रतिक्रिया