अमेरिकी राष्ट्रपति डोनाल्ड ट्रम्पले आइतबार गाजाको २० महिना लामो द्वन्द्वमा युद्धविरामका लागि वार्तामा प्रगति गर्न आग्रह गरेका छन् । उनको यो आह्वान इजरायली सेनाले उत्तरी गाजामा आफ्नो आक्रमण तीव्र पार्दै नयाँ ठूलो संख्यामा मानिसहरूलाई खाली गर्न आदेश दिएसँगै आएको हो।

ट्रम्पले आइतबार बिहान आफ्नो सामाजिक सञ्जाल ‘ट्रुथ सोसल’ मा लेखेका थिए, “गाजामा सम्झौता गरौं। बन्धकहरूलाई फिर्ता ल्याउनुहोस्!!!” यो उनले आफ्नो कर र खर्च कटौती विधेयकमा सिनेटको मतदानसम्बन्धी प्रकाशनहरूको बीचमा लेखेका थिए।

ट्रम्पले शुक्रबार ओभल अफिस(कार्यालय)मा पत्रकारहरूसँग कुरा गर्दै अर्को हप्ताभित्र युद्धविराम सम्झौता हुन सक्ने बताएका थिए । उनले भनेका थिए, “हामी गाजामा काम गरिरहेका छौं र यसलाई ठीक गर्ने प्रयास गर्दैछौं।”

एक इजरायली अधिकारीका अनुसार प्रधानमन्त्री बेन्जामिन नेतन्याहुका एक शीर्ष सल्लाहकार, मन्त्री रोन डर्मर यस हप्ता युद्धविराम वार्ताका लागि वाशिंगटन आउने तयारीमा छन्।

ट्रम्पले इजरायल र हमासलाई गाजा भूभागमा करिब दुई वर्षदेखिको युद्ध अन्त्य गर्न बारम्बार आह्वान गर्दै आएका छन्। जनवरीमा ट्रम्पले पदभार ग्रहण गरेलगत्तै आठ हप्ताको युद्धविराम भए पनि नयाँ सम्झौतामा पुग्ने प्रयास असफल भएका छन् । युद्धविराम सम्झौताको एक प्रमुख अवरोध भनेको युद्ध पूर्ण रूपमा अन्त्य हुने वा नहुने भन्ने हो।

हमासका अधिकारी महमुद मर्दावीले नेतन्याहुले सम्झौतामा प्रगतिलाई रोकिरहेको आरोप लगाएका छन् । टेलिग्राम सन्देश अनुप्रयोग (मेसेजिङ एप)मा उनले इजरायली नेताले केवल १० बन्धकहरूलाई मात्र रिहा गर्ने अस्थायी सम्झौतामा जोड दिएको बताए ।

नेतन्याहुका प्रवक्ता ओमर डोस्ट्रीले मर्दावीको दाबीलाई सम्बोधन नगरी भने, “हमास नै युद्ध अन्त्यको एक मात्र बाधा हो।”

हमासले इजरायली सेनाको पूर्ण फिर्ती र युद्धको अन्त्यको बदलामा सबै बन्धकहरूलाई रिहा गर्न तयार रहेको बताएको छ ।

गाजाको युद्ध ७ अक्टोबर, २०२३ मा हमासका आतंककारीहरूले इजरायलमा आक्रमण गर्दा सुरु भएको थियो । जसमा १,२०० मानिसहरू मारिएका थिए । लगभग २५० जनालाई बन्धक बनाइएको थियो । तीमध्ये करिब ५० जना अझै बन्धक छन्, जसमध्ये आधाभन्दा कम जीवित रहेको विश्वास गरिन्छ ।

गाजाको हमास-नियन्त्रित स्वास्थ्य मन्त्रालयले आइतबार इजरायली आक्रमणमा विगत २४ घण्टामा थप ८८ जनाको मृत्यु भएको बताएको छ । २० महिनाभन्दा बढीको लडाइँमा मृत्यु हुनेको संख्या ५६,५०० पुगेको छ ।

इजरायली सेनाले आइतबार उत्तरी गाजाका ठूला क्षेत्रहरूमा प्यालेस्टिनीहरूको ठूलो मात्रामा निकासीको आदेश दिएको छ ।