बिहीबार, मंसिर १८ २०७७
काठमाडौं १६:१४
वासिङटन डिसी 05:29

सभाध्यक्षले प्रमुख सचेतकसँग बुधबार छलफल गर्ने

इनेप्लिज २०७१ चैत १० गते १३:४९ मा प्रकाशित

subash-nembang_20150123073453काठमाडौँ, १० चैत । संविधानसभाका अध्यक्ष सुवास नेम्वाङले संविधानसभाको बैठक आह्वान गर्ने विषयमा छलफल गर्न संविधानसभामा प्रतिनिधित्व गर्ने राजनीतिक दलका प्रमुख सचेतकलाई बुधबार निमन्त्रणा गर्नुभएको छ ।

संविधानका विवादित विषयमा सहमति जुटाउन दललाई सभाध्यक्ष नेम्वाङले यही चैत ११ गतेसम्मको समयसीमा प्रदान गर्नुभएको थियो । एकीकृत नेकपा(माओवादी) नेतृत्वको तीस दलीय मोर्चाले आन्दोलनको कार्यक्रम घोषणा गरेको र दलबीच सहमति हुन नसकेको सन्दर्भमा भावी रणनीति कसरी तय गर्ने भन्ने विषयमा प्रमुख सचेतकसँग सभाध्यक्षले छलफल गर्न लाग्नुभएको हो ।

लामो समयसम्म संविधानसभाको बैठक स्थगन गर्न नमिल्ने र तत्काल सहमति जुटाउन नेम्वाङले पटक पटक प्रमुख राजनीतिक दलका शीर्ष नेतालाई आग्रह गर्दै आउनुभएको छ । उहाँको आग्रह विपरीत प्रमुख दलका शीर्ष नेताको हालसम्म औपचारिक बैठकसमेत बस्न सकेको छैन । अनौपचारिक संवाद भए पनि ठोस प्रगति हुन नसक्दा संविधानसभाको बैठक अनिश्चित बन्दै गएको छ ।

केही दिन पहिले मात्रै सभाध्यक्ष नेम्वाङले प्रमुख दलका शीर्ष नेतालाई बोलाएर तत्काल सहमति गर्न आग्रह गर्नुभएको थियो । शीर्ष नेताले आफूहरु संवादमा रहेको र छिट्टै सहमति हुने विश्वास दिलाए पनि सहमति भए नभएका बारे प्रमुख दलका शीर्ष नेताले हालसम्म आफूलाई जानकारी गराएका छैनन् भन्दै आउनुभएको छ ।

आज आफ्नै कार्यकक्ष सिंहदरबारमा सञ्चारकर्मीसँग कुरा गर्दै नेम्वाङले संविधानसभाको बैठक बोलाउने सन्दर्भमा छलफल गर्न प्रमुख सचेतकलाई बोलाइएको जानकारी दिनुभयो । ‘‘जनताले संविधानसभाको बैठक कहिले बस्छ, संविधान जारी गर्ने कार्यतालिका कहिले हो भन्दै प्रश्न गरेको ग¥यै छन्, मसँग जनतालाई जवाफ दिने कुनै उत्तर छैन, प्रमुख सचेतकले केही जवाफ दिनुहुन्छ कि भनेर बोलाएको हुँ”, नेम्वाङले भन्नुभयो ।

प्रतिक्रिया