सो हिंसामा परी शनिबार नौ जनाको ज्यान गएको छ । आन्दोलनकारीहरुले शनिबार पनि पेट्रोल बम प्रहार गरेका छन् । आन्दोलनकारीहरुले आम हड्तालको उल्लंघन गरी सवारी चलाएको भन्दै यसअघि पनि बसमा बम हान्ने गरेका छन् ।

सो आन्दोलनका कारण गएको महिनादिनमा कम्तीमा पनि ७६ जनाको ज्यान गएको पछिल्लो तथ्याङ्कमा जनाइएको छ । शुक्रबार साँझ तथा शनिबार पनि विभिन्न स्थानमा बम प्रहार भएका छन् र ती हमलामा परी कम्तीमा पनि नौ जना सर्वसाधारण मारिएका छन् ।

पछिल्लो समयमा सो आन्दोलन हिंसात्मक भएपछि संयुक्त राज्य अमेरिकाले शुक्रबार मात्र शान्तिपूर्ण रुपमा सबै समस्याको समाधान खोज्न आग्रह गरेको थियो ।

त्यसैगरी विश्वका अन्य देशहरुले पनि आन्दोलनप्रति गम्भीर चासो व्यक्त गरेको जनाइएको छ । सो आन्दोलनका क्रममा हिंसा बढेको, पेट्रोल बम प्रहार गर्ने गरेको र यसमा परी सर्वसाधारण मारिने गरेको प्रति अन्तर्राष्ट्रिय रुपमा नै चासो व्यक्त गरिएको हो ।

बङ्गलादेशको दक्षिणी नगर गौर नदीमा आन्दोलनकारी विपक्षी दलका नेताहरुले गुडिरहेको ट्रकमा बम हानेका थिए । सो बमपछि लागेको आगोमा परी तीनजना नागरिक ज्युँदै जलेका थिए ।

त्यसैगरी शुक्रबार साँझ पनि सोही नगरमा भएको यस्तै प्रकारको हिंसामा परी तीनजना नागरिक मारिएका छन् । आन्दोलनकारीहरुले महिनादिनदेखि जारी राखेको आम हड्तालमा यातायात नचलाउन दबाब दिइरहेका छन् ।

तर निकै लामो समयदेखि जारी रहेको सो आमहड्तालका सर्वसाधारण नागरिकमा समस्या उत्पन्न भएको भन्दै नागरिकले स्वतस्फुर्त रुपमा सवारी चलाएका कारण उनीहरु आन्दोलनकारीको बमको शिकार भएका बताइएको छ ।

बङ्गलादेशमा गत महिनाको सुरुदेखि नै सो आन्दोलन सुरु भएको हो । त्यहाँका आठवटा भन्दा बढी विपक्षी दलले सो आन्दोलनमा सहभागिता जनाइरहेका छन् ।

प्रमुखविपक्षी नेत्री एवम् पूर्व प्रधानमन्त्री बेगम खालिदा जियाको दलले आन्दोलनको नेतृत्व गरेको छ । उहाँको दलसहितका विपक्षी दलहरुले गत जनवरी ५ तारिखदेखि सरकार विरुद्ध आन्दोलन थालेका हुन् ।

उनीहरुले प्रधानमन्त्री शेख हसिनाको राजिनामा मागेका छन् । प्रधानमन्त्रीले राजिनामा नदिएसम्म आन्दोलन नरोकिने उनीहरुको अडान छ ।

गतवर्ष भएको आमनिर्वाचन निश्पक्ष रुपमा हुन नसकेको भन्दै विपक्षी दलले सो निर्वाचन वहिष्कार गरेका थिए । उनीहरुले वर्तमान प्रधानमन्त्रीको राजिनामा र अर्काे निर्वाचनको माग गरिरहेका छन् । रासस/सिन्ह्वा