शनिबार, कार्तिक ८ २०७७
काठमाडौं १४:२४
वासिङटन डिसी 04:39

रुँदै विद्यालय छिरे बालबालिका

इनेप्लिज २०७१ पुष २८ गते ८:४३ मा प्रकाशित

पेसावर, २८ पुस । गत महिनामात्र पाकिस्तानको पेसावर सहरमा तालिवान आतङ्ककारीहरुले हमला गरी दर्जनौँ बालबालिकाको ज्यान लिएपछि बन्द रहेको सो विद्यालय सोमबारदेखि खुलेको छ ।

त्यो नरसंहारपछि आज पहिलो दिन विद्यालय पुगेका बालबालिका विद्यालयको मूलद्वारमा पुगेपछि सबैजना डाँको छोडेर रोएका थिए ।

करिब महिना दिनअघि आँखै अगाडि आफ्नै साथीहरु गोलीलागि मारिएको देखेका उनीहरुले सो विद्यालयमा पहिलो दिन पुगेपछि मन थाम्न सकेनन् ।

उनीहरु आजदेखि विद्यालय जान थालेको समाचारमा जनाइएको छ । गत डिसेम्बर १६ मा सो विद्यालयमा हमला गरी तालिवानहरुले १५० जनाको ज्यान लिएका थिए ।

मारिएक १५० मध्ये अधिकांश बालबालिका रहेका थिए । पाकिस्तानी सैनिकद्वारा सञ्चालित सो विद्यालयमा मारिनेमा साना नानीबाबुहरु परेकामा विश्वले नै सो घटनाको निन्दा र भत्र्सना गरेको थियो ।

सो गोलीकाण्डमा परी घाइते समेत भएका एकजना १६ वर्षीय विद्यार्थी शाहरुख खानले भने– मेरा ३० जना साथीहरुलाई हत्या गरिदिएका छन, म अब कसरी त्यो खाली कोठामा बसुँ, मेरा साथीहरुको खाली बेञ्च मैले कसरी हेरुँ ।

मेरो मुटु टुक्रा परेकोजस्तो भएको छ, मेरा जतिपनि साथीहरु थिए ती सबै गुमाएपछि म अब म त्यो विद्यालयमा उपस्थित भएर मन थाम्न कसरी सकुँला– उनले भने ।

तर बालबालिकाहरु विद्यालय आएका छन् । उनीहरु रुँदै कराँदै विद्यालय प्रवेश गरेका छन् । त्यो देखेर उनीहरुका अभिभावकहरु पनि डाँको छोडेर रोएका छन्– पेसावरबाट प्राप्त समाचारमा जनाइएको छ ।

सो विद्यालयमा २० जना जति सैनिक राखिएको छ । सो सुरक्षा घेराबाट बालबालिकालाई भित्र छिराइएको छ । उनीहरुको अगाडि अहिले त्यस्तो कुनै भौतिक वस्तुको त्रास नरहेको भएपनि ती कलिला नानीबाबुहरुको मन भने डराएकै छ ।

उक्त क्षेत्रमा विगत लामो समयदेखि नै आतङ्कवादी क्रियाकलापहरु जारी नै रहेकोमा विद्यालय तथा अस्पतालहरुमा प्राय यस्तो हमला हुने गरेको थिएन ।

तर पेसावरको उक्त विद्यालयमा गरिएको हमला पाकिस्तानी इतिहासकै सबैभन्दा क्रुर र हिंस्रक रहेको बताइएको थियो । तिनै बालबालिकाका आफ्ना साथीहरु मारिएको स्थानमा आज उनीहरु पहिलो पटक विद्यालय गएका छन् ।

विद्यालयहरुमा अपनाइएको सुरक्षाको अवस्था कमजोर रहेको अर्थात् सरकारले साना नानीहरुलाई पनि बचाउन नसकेको भन्दै सरकारको व्यापक आलोचना पनि भएको थियो ।

तर शिक्षाका अधिकारीहरुले त्यसपछि पाकिस्तानका कतिपय यस्ता विद्यालय र सम्वेदनशिल शिक्षण तथा स्वास्थ्य संस्थाहरुमा सुरक्षाको मापदण्ड अपनाइएको बताएको छ । रासस/एएफपी

प्रतिक्रिया