बुधबार, मंसिर ४ २०७६
काठमाडौं ०५:०५
वासिङटन डिसी 18:20

विश्वप्रसिद्ध श्रीरामचरितमानस अब नेपालीमा

इनेप्लिज २०७६ कार्तिक २२ गते ३:०२ मा प्रकाशित

 

गोस्वामी तुलसीदासले १६ औं शताब्दीमा रचना गरेको विश्वकै सुन्दरतम काव्य श्रीरामचरितमानसको आचार्य तुलसीराम शर्मा द्वारा नेपालीमा समछन्द र समशैलीमा अनूदित नेपाली रामचरितमानसलाई हरिहर सन्यास आश्रम देवघाटले प्रकाशन गरि हरिहर मन्दिर धापासीमा भव्य समारोहका बीच माननीय उपप्रधानमन्त्री तथा रक्षामन्त्री श्री ईश्वर पोखरेल ज्यूको प्रमुख आतिथ्यमा लोकार्पण गरेको छ।मन्दिरका अध्यक्ष श्री दिवाकर दाहालज्यूको सभापतित्वमा सम्पन्न उक्त कार्यक्रममा नेपाली रामचरितमानस माथि प्रकाश पार्दै माननीय उपप्रधानमन्त्री तथा रक्षामंत्री श्री ईश्वर पोख्रेलज्यूले हरिहर सन्यास आश्रमको यस प्रकाशनले नेपाली समाजलाई ठूलो गुन लगाएको छ र यो ग्रन्थ जन जनमा पुगेर आदर्श नेपाली समाज निर्माण गर्न सकोस् भनी शुभकामना व्यक्त गर्नु भयो ।विशिष्ट अतिथिको आशनबाट नेपाल प्रज्ञा प्रतिष्ठानका उपकुलपति डा. श्री जग मान गुरुङले नेपालीमा रामचरितमानसको इतिहासलाई केलाउँदै प्रस्तुत ग्रन्थले नेपाली साहित्यको श्रीवृद्धिमा ठूलो योगदान पुर्याउने विश्वास व्यक्त गर्नु भयो ।भारतीय राजदूतावासको प्रतिनिधित्व गरि पाल्नुभएको प्रा. केदारनाथ शर्माज्यूले भारतीय राजदूतावास, महामहिम राजदूत र भारतीय जनताको तर्फबाट शुभकामना ब्यक्त गर्दै भारतमा तुलसीदासले रचित यो ग्रन्थ नेपालमा तुलसीरामद्वारा अनूदित हुनु अनौठो संयोग परेको उल्लेख गर्नुभयो।उहाँले भारतमा जसरी रामचरितमानसको लोकप्रियता र अनुष्ठेयता छ त्यसै गरि नेपालमा पनि नेपाली रामचरितमानसले लोकप्रियता प्राप्त गरोस् घर घरमा यसलाई गाइयोस् भन्नुभयो।टोखा नगरपालिका धापासीका नगरप्रमुख ज्यूले नेपाली भक्ति साहित्यमा यस ग्रन्थले वर्तमान युगको प्रतिनिधित्व गर्ने विश्वास व्यक्त गर्नुभयो ।कार्यक्रममा कालिका सँस्कृत विद्यापीठका प्राचार्य सह प्रा रामचन्द्र कण्डेलज्यूले परमानन्दीय परंपरा र अनुवादकको परिचय प्रस्तुत गर्दै सबैको स्वागत गर्नुभएको थियो। ग्रन्थका प्रधान संपादक सह प्रा. डा. वासुदेव खनालज्यूले यस महान ग्रन्थको आँफुलाई प्रधान संपादक बन्ने सौभाग्य प्राप्त भएकोमा खुशि व्यक्त गर्दै सीता जनक र जनकपुरधाम वर्णन द्वारा यस ग्रन्थले नेपाली मन मुटुलाई छोएको छ भन्नुभयो ।कार्यक्रमको समुद्घाटन परमानन्द सँस्कृत गुरुकुलम्का वटुकहरुबाट स्वस्तिवाचन सहित प्रमुख अतिथिज्यूद्वारा पानसमा बत्ती बालेर  गरिएको थियो भने लगत्तै पौराणिक मंगलाचरणको रुपमा प्रस्तुत ग्रन्थबाटै सुप्रसिद्ध साध्वीद्वय आचार्या सरस्वती चौलागाई र आचार्या गार्गी चौलागाईले सुमधुर रागमा दोहा चौपाई गाएर सबैलाई मन्त्रमुग्ध पारेका थिए।

नेपाल टेलिभिजनका सदस्य सचिव टंक पन्तज्यूले संचालन गर्नुभएको उक्त कार्येक्रममा नेपाली रामचरितमानसका अनुवादक आचार्य तुलसी राम शर्माले सबै नेपालीभाषीहरुलाई बुझ्न सजिलो होस् भनेर यो विश्वप्रसिद्ध सुमधुर काव्य नेपाली भाषामा जस्ताको तस्तै छन्दमा छायानुवाद गरिएको हो भन्नु भयो ।कार्यक्रममा सिद्धाश्रम शक्ति केन्द्रका संयोजक रामजी अर्याल लगायत धार्मिक साहित्यिक सामाजिक र राजनैतिक विशिष्ट व्यक्तित्वहरुको गरिमामय उपस्थिति थियो।

चितवननिवासी रामचरितमानसका नेपाली अनुवादकको जन्म बाग्लुंग हो।शर्मा हाल अमेरिकाको डालसमा निवास गर्दै आउनु भएको छ।यो पुस्तक अब छिटै नै अमाजोनबाट विश्व भरि नै प्राप्त गर्न सकिने कुरा लेखकले बताउनु भयो।

प्रतिक्रिया