मंगलबार, कार्तिक ११ २०७७
काठमाडौं ०८:५३
वासिङटन डिसी 23:08

बृहत् कार्यकर्ता भेलाका लागि एमालेको तयारी

इनेप्लिज २०७१ माघ ३ गते ११:४४ मा प्रकाशित

CPN_UML_office-1काठमाडौँ, ३ माघ । नेकपा एमालेले यही माघ ५ गते काठमाडौँमा आयोजना गर्ने बृहत् कार्यकर्ता भेलाको तयारीका लागि आज केन्द्रीय कार्यालय बल्खुमा उपत्यकाका पार्टी कमिटी प्रमुख, जनसङ्गठनका प्रमुख र केन्द्रीय तथा अञ्चल सम्पर्क कमिटीका अध्यक्ष एवम् प्रतिनिधिसहितको संयुक्त बैठक सम्पन्न भएको छ ।

संविधानसभाबाट संविधान निर्माणका सन्दर्भमा भइरहेका पछिल्ला घटनाका बारेमा पार्टीपङ्क्तिलाई जानकारी गराउने, संविधान निर्माणका लागि पार्टीका तर्फबाट सकारात्मक पहलकदमी लिने, संविधान निर्माणको विषयवस्तु र प्रक्रियाका बारेमा आम जनसमुदायलाई अवगत गराउने उद्देश्यले सो भेलाको आयोजना हुन लागेको हो ।

आजको संयुक्त बैठकमा पार्टी महासचिव ईश्वर पोखरेलले निर्वाचन प्रणाली, न्याय प्रणाली, शासकीय स्वरुपका विषयमा नेकपा एमाले लचिलो हुन तयार रहेको बताउँदै राज्य पुनःसंरचनाका विषयमा भने एनेकपा माओवादी लगायतका अन्य दल लचिलो भए सहमतिका साथ संविधान निर्माण हुने बताउनुभयो ।

उहाँले मिश्रित निर्वाचन प्रणाली अपनाउन पार्टी तयार रहेको उल्लेख गर्दै न्याय प्रणाली विभाजित नहुने गरी निश्चित काम, कर्तव्य र अधिकार तोकेर बढीमा १० वर्षका लागि संवैधानिक अदालत गठन गर्न सकिने धारणा पनि राख्नुभएको बैठकमा सहभागीले जनाएका छन् ।

सचिव योगेश भट्टराराईले आज जारी गर्नुभएको विज्ञप्तिमा सोमबार हुने उक्त भेलामा पार्टीका अध्यक्ष केपी शर्मा ओलीलगायत पार्टीका वरिष्ठ नेताद्वारा संविधान निर्माणका क्रममा विकसित पछिल्ला परिस्थितिका सन्दर्भमा पार्टीका धारणाबारेमा सम्बोधन गर्ने निर्णय भएको जनाइएको छ ।

प्रतिक्रिया