लोकतन्त्रमा आवधिक निर्वाचन आवश्यक: आयुक्त उप्रेती

लुम्बिनी (रुपन्देही), २१ माघ । प्रमुख निर्वाचन आयुक्त नीलकण्ठ उप्रेतीले लोकतन्त्रलाई सुदृढ गर्न आवधिक निर्वाचन आवश्यक भएको बताउनुभएको छ ।

उहाँले निर्वाचन नहुँदा लोकतन्त्र धर्मराउने उल्लेख गर्दै निर्वाचनले मात्र लोकतन्त्रको सुधार हुने बताउनुभयो ।

निर्वाचन आयोगले निर्वाचन आचारसंहिता तर्जुमा सम्बन्धमा आज भैरहवामा सरोकारवालासँगको अन्तरक्रियामा प्रमुख आयुक्त उप्रेतीले नेपालमा लोकतन्त्र पटकपटक प्राप्त भएपनि यसको सुदृढीकरण भने हुन नसकेकाले यसलाई दिगो बनाउनुपर्ने आजको आवश्यकता भएको बताउनुभयो ।

उहाँले निर्वाचनका विविध पक्षमा सुधारको आवश्यता रहेको भन्दै नेपालमा राजनीतिक दलले आचारसंहितालाई विभिन्न बहानामा मिच्ने गरेको भन्दै त्यसो नर्गन आग्रह गर्नुभयो ।

उहाँले मतादाता नामावलीलाई अद्यावधिक गर्न फागुन १ गतेबाट गाउँगाउँमा जान लागेको जानकारी गराउनुभयो ।

जिल्ला न्यायाधीश खड्कबहादुर केसीले आचारसंहितालाई कसरी व्यवहारिक बनाउन सकिन्छ र आचारसंहिता उल्लङ्न गर्नेलाई गर्ने कारबाही स्पष्ट हुनुपर्ने बताउनुभयो ।

निमित्त प्रमुख जिल्ला अधिकारी कौशलराज शर्माले निर्वाचनलाई व्यवस्थित गर्न आचारसंहिताको पालना जरुरी भएको बताउनुभयो ।