अमेरिकी राष्ट्रपति डोनाल्ड ट्रम्पले मेक्सिकोविरुद्ध लगाइने २५% शुल्क एक महिनाका लागि स्थगित गर्ने घोषणा गरेका छन्।

 यो निर्णय ट्रम्प र मेक्सिकोका राष्ट्रपति क्लाउडिया शेइनबाउमबीचको “एकदमै मैत्रीपूर्ण” वार्तापछि गरिएको हो।

ट्रम्पका अनुसार, मेक्सिकोले अमेरिका-मेक्सिको सीमा क्षेत्रमा १०,००० नेशनल गार्ड( राष्ट्रिय सुरक्षाकर्मी) पठाउन सहमत भएको छ। यी सैनिकहरू विशेष रूपमा लागू औषध फेन्टानिलको तस्करी रोक्न र अवैध आप्रवासन नियन्त्रण गर्न तैनाथ गरिनेछन्।

दुबै देशले व्यापार र सुरक्षासम्बन्धी छलफललाई अघि बढाउन उच्चस्तरीय वार्ताकारहरू पठाउने सहमति गरेका छन्। अमेरिकी पक्षबाट विदेश मन्त्री मार्को रुबियो, वित्त मन्त्री स्कट बेस्सेन्ट, र वाणिज्य मन्त्री होवार्ड लुटनिक सहभागी हुनेछन्। ट्रम्पले आफैं पनि वार्तामा संलग्न हुने बताएका छन्।

तर, क्यानडा र चीनविरुद्ध लगाइने नयाँ शुल्क भने यथावत् रहनेछ। ट्रम्प प्रशासनले आप्रवासन र फेन्टानिल तस्करीलाई राष्ट्रिय सुरक्षासँग जोड्दै यी शुल्कहरू आवश्यक रहेको दाबी गरेको छ। क्यानडाले यसको प्रतिवादमा प्रतिशोधी कदम चाल्ने चेतावनी दिएको छ, जसले बजारमा गिरावट ल्याएको छ।

यो सम्झौताले अमेरिका-मेक्सिको सम्बन्धलाई सुधार गर्ने संकेत देखिएको छ।