अमेरिकाको लुजियाना राज्यको ह्यामन्ड शहरमा बन्दुकधारीहरूले गलत व्यक्तिलाई निशाना बनाउने क्रममा एक निर्दोष महिलाको ज्यान लिएका छन्।

प्रहरीका अनुसार आक्रमणकारीहरूले एउटा निजी वाहन (कार)लाई पछ्याइरहेका थिए। उनीहरूको वास्तविक लक्ष्य अर्को व्यक्ति थियो, जो केही समयअघि उक्त सवारी साधनमा बसेका थिए। तर गोली चलाइनुअघि ती व्यक्ति कारबाट ओर्लेर अर्को गाडीमा गइसकेका थिए।

एबिसीन्यूजका अनुसार बिहीबार बिहान एउटा कार शेभरोन इन्धन चौकी (ग्यास स्टेशन)मा पुगेपछि आक्रमणकारीहरू पनि त्यहाँ पुगे। गाडीका चालक इन्धन चौकी (ग्यास स्टेशन)भित्र गएको बेला आक्रमणकारीहरूको गाडी छेउमा रोकियो र उनीहरूले अन्धाधुन्ध गोली चलाउन थाले।

प्रहरी प्रमुख एडविन बर्जेरोन जुनियरका अनुसार आक्रमणकारीहरूले ७० देखि ८० पटक सम्म गोली चलाएका थिए। त्यस क्रममा गाडी भित्र बसेकी ५० वर्षीया प्याट्रिसिया शेपार्डको मृत्यु भयो।

प्रहरीले शेपार्ड पूर्ण रूपमा निर्दोष रहेको र घटनासँग कुनै सम्बन्ध नरहेको बताएका छन्। “उनी गलत समयमा गलत ठाउँमा परेकी एक निर्दोष महिला थिइन्,” प्रहरी प्रमुखले भने।

अनुसन्धानकर्ताहरू कम्तीमा दुईदेखि तीन जना संदिग्धको खोजी गरिरहेका छन्। प्रहरीका अनुसार उनीहरू सन् २००८ नमुनाको सेतो हन्डा सिभिक कारमा सवार थिए। उक्त गाडी मिसिसिपी राज्यबाट चोरी भएको थियो।

प्रहरीले घटनाबारे कुनै जानकारी भए तुरुन्त सम्पर्क गर्न सर्वसाधारणलाई आग्रह गरेको छ। दोषीहरू पक्राउ नपरेसम्म अनुसन्धान जारी रहने प्रहरीले जनाएको छ।