अमेरिकाको नर्थ क्यारोलाइना राज्यको एक विद्यालयको दीक्षान्त समारोह (ग्य्राजुएसन सेरेमोनी) सकिए लगत्तै बाहिर गोली चल्दा एक १८ वर्षीय युवाको मृत्यु भएको छ भने ११ वर्षीया बालिकासहित अन्य तीन जना घाइते भएका छन्।

यो दुःखद घटना गत बुधबार स्थानीय समय अनुसार बेलुकाको करिब ७:१५ बजे फेयरफिल्ड हाई स्कूल(उच्च माध्यमिक बिद्यालय)को सवारी साधन अडान गर्ने ठाउँ (पार्किङ लट) मा भएको हो। त्यहाँ ‘सेम येटो हाई स्कूल’ का विद्यार्थीहरूको दीक्षान्त समारोह भर्खरै सकिएको थियो। उत्सव मनाएर मानिसहरू निस्कने क्रममा अचानक गोली चल्न सुरु भयो।

प्रहरीले दिएको जानकारी अनुसार यस गोलाबारीमा जम्मा चार जनालाई गोली लागेको थियो। जसमा एक १८ वर्षीय युवाको ज्यान गयो। घाइते हुनेहरूमा ११ वर्षकी एक बालिका, २० वर्षका एक युवा र २५ वर्षका अर्का व्यक्ति रहेका छन्। एबिसीन्यूजका अनुसार ज्यान गुमाएका १८ वर्षीय युवा सोही विद्यालयबाट भर्खरै ग्य्राजुएट भएका विद्यार्थी थिए वा थिएनन् भन्ने कुरा अझै स्पष्ट भइसकेको छैन।

घटनाको समयमा उक्त ठाउँमा करिब १,००० जना मानिसहरू उपस्थित थिए। प्रहरीले बिहीबार जारी गरेको विज्ञप्ति अनुसार त्यहाँ सयौँको संख्यामा प्रत्यक्षदर्शीहरू (घटना आँखाले देख्ने मानिसहरू) रहेका छन्। प्रहरीका जासुसहरूले अहिले ती साक्षीहरूसँग सोधपुछ गरिरहेका छन् र अपराधी पत्ता लगाउन प्रमाणहरू खोज्दै छन्।

प्रहरीले अहिलेसम्म आक्रमण गर्ने शङ्कास्पद व्यक्ति वा व्यक्तिहरूको बारेमा कुनै थप जानकारी सार्वजनिक गरेको छैन। विद्यालय जिल्ला प्रशासनले एक विज्ञप्ति जारी गर्दै यस घटनाबाट प्रभावित भएका सबै परिवारप्रति गहिरो दुःख र सहानुभूति व्यक्त गरेको छ।