अमेरिकाको भर्जिनिया राज्यमा दुई जना उप-प्रहरी माथि गोली प्रहार गरी एक जनाको ज्यान लिने संदिग्ध व्यक्तिलाई प्रहरीले पक्राउ गरेको छ। क्यारोल काउन्टी प्रहरी कार्यालयका अनुसार धेरै खोजतलास गरेपछि आइतबार ती संदिग्ध व्यक्ति समातिएका हुन्।

प्रहरीका अनुसार पक्राउ पर्नेमा ५५ वर्षका माइकल पकेट रहेका छन्। उनलाई भर्जिनियाको छिमेकी राज्य नर्थ क्यारोलाइनाको सरी काउन्टीबाट पक्राउ गरिएको हो। उनलाई पक्रनका लागि अमेरिकी गुप्तचर निकाय एफबिआइ र युएस मार्सल्स सर्भिसले ६० हजार डलरको पुरस्कार समेत राखेका थिए।

गएको शुक्रबार राति करिब ९:२६ बजे, प्रहरीहरू रिचमन्ड नजिकैको एउटा घरमा त्यहाँ रहेका मानिसहरूको अवस्था ठीक छ कि छैन भनेर बुझ्न गएका थिए। त्यहाँ पुग्दा उनीहरूको जम्काभेट माइकल पकेटसँग भयो। माइकलले अचानक प्रहरीमाथि अन्धाधुन्ध गोली चलाउन थाले। प्रहरीहरूले पनि आत्मरक्षाका लागि जवाफी गोली चलाए, तर त्यही बीचमा माइकल त्यहाँबाट भाग्न सफल भए। एबिसीन्यूजका अनुसार उनले गोली चलाउनुको कारण भने अझै खुल्न सकेको छैन।

यस दुखद घटनामा ज्यान गुमाउने उप-प्रहरी २0२३ देखि कार्यरत लोगन उट थिए। उनी पूर्व सैनिक पनि हुन्। क्यारोल काउन्टीका मुख्य प्रहरी अधिकारी केभिन केम्पले लोन उत्तलाई एक ‘नायक’ भन्दै सम्मान व्यक्त गरेका छन्। सानैदेखि प्रहरी बन्ने सपना बोकेका उट आफ्नी श्रीमती, छोराछोरी र परिवारका निकै प्यारा सदस्य थिए।

माइकल भागेपछि उनलाई खोज्न ठूलो अभियान चलाइएको थियो। आइतबार बिहान नर्थ क्यारोलाइनाको एउटा जंगलमा राखिएको स्वचालित क्यामरा (चित्रग्राहिणी)मा उनको तस्बिर देखिएपछि प्रहरीले उनलाई घेरा हालेर पक्रन सफल भएको हो।