अमेरिकी राष्ट्रपति डोनाल्ड ट्रम्पले इरानले राखेको नयाँ शान्ति प्रस्तावमा आफू सन्तुष्ट नभएको बताएका छन् । ह्वाइट हाउसमा पत्रकारहरूसँग कुरा गर्दै उनले भने , “इरान सम्झौता त गर्न चाहन्छ, तर उनीहरूले यस्ता कुरा मागेका छन् जुन म स्वीकार गर्न सक्दिनँ।”

राष्ट्रपति ट्रम्पका अनुसार इरानको नेतृत्व अहिले अन्यौलमा छ र उनीहरूबीच एकआपसमा कुरा मिलिरहेको छैन। उनले इरानी नेताहरू विभाजित भएका कारण ठोस निर्णय हुन नसकेको टिप्पणी गरे ।

अमेरिकी सैन्य सेनापतिहरूसँगको छलफलपछि ट्रम्पले इरानका लागि अब दुईवटा मात्र बाटो बाँकी रहेको बताएका छन् । पहिलो बाटो— इरानमाथि भीषण आक्रमण गरेर उसलाई सधैँका लागि सिध्याइदिने, र दोस्रो बाटो— शान्ति सम्झौता गर्ने। ट्रम्पले भने , “मानवीय नाताले म युद्ध चाहन्न, तर सम्झौता नभए आक्रमणको विकल्प रहन्छ।”

यसैबीच, एपीका अनुसार अमेरिकी सरकारले संसदलाई एउटा पत्र पठाउँदै इरानसँगको मुख्य लडाइँ “अन्त्य” भएको दाबी गरेको छ। वास्तवमा, अमेरिकी कानुन अनुसार मे १ तारिखभित्र युद्ध जारी राख्न संसदको अनुमति लिनुपर्ने थियो। तर, “युद्ध सकियो” भन्दै ट्रम्पले संसदको अनुमति लिनुपर्ने कानुनी झन्झटलाई छलेका छन् ।

यद्यपि, सोही पत्रमा उनले इरानबाट अझै पनि अमेरिकालाई ठूलो खतरा रहेको र अमेरिकी सेना त्यस क्षेत्रमा बसिरहने कुरा पनि उल्लेख गरेका छन् ।कागजी रूपमा युद्ध सकिएको भनिए पनि मैदानमा खतरा अझै टरेको छैन।

यो युद्ध दुई महिनाअघि संसदको अनुमति बिना नै सुरु भएको थियो। अहिले वार्ताहरू दूरवार्ता (टेलीफोन)मार्फत भइरहेका छन्, तर इरानभित्रको आन्तरिक विवाद र अमेरिकाको कडा अडानका कारण शान्ति सम्झौता निकै कठिन देखिएको छ। अब इरानले ट्रम्पको यो चेतावनीलाई कसरी लिन्छ भन्ने कुराले आगामी दिनको दिशा तय गर्नेछ।