अमेरिकी सेन्ट्रल कमाण्डका प्रमुखले बुधबार एक विशेष जानकारी दिँदै हर्मुज जलडमरूमा गरिएको अमेरिकी नाकाबन्दीका कारण हालसम्म ४२ वटा जहाजहरूलाई फिर्ता पठाइएको बताएका छन् ।

अमेरिकी सैनिक प्रमुख ब्राड कुपरका अनुसार, अहिले ४१ वटा तेल बोक्ने इन्धन बोक्ने जहाज (ट्याङ्कर)हरू समुद्रमा रोकिएका छन्। ती जहाजहरूमा ६ करोड ९० लाख ब्यारेल तेल रहेको छ, जुन इरानले बेच्न पाएको छैन। यो तेलको मूल्य ६ अर्ब डलर (नेपाली करिब ८ खर्ब रुपैयाँ) भन्दा बढी हुन्छ। यो नाकाबन्दीका कारण इरानको नेतृत्वले ठूलो आर्थिक नोक्सानी व्यहोर्नु परेको छ।

यसैबीच, एउटा जहाज ‘एम/टी टोस्का’ मा रहेका ६ जना इरानी चालक दलका सदस्यहरूलाई अमेरिकाले रिहा गरिदिएको छ। तर, अझै पनि २२ जना इरानी नागरिकहरू अमेरिकी हिरासतमा रहेका छन्। जानकारी अनुसार, अमेरिकाले जहाज नियन्त्रणमा लिँदा केही चालक दलका सदस्यहरूका साथमा उनीहरूका परिवार पनि जहाजमै थिए। अमेरिकाले पटक-पटक दिएको चेतावनीलाई वास्ता नगरी नाकाबन्दी तोड्न खोजेपछि उक्त जहाज नियन्त्रणमा लिइएको थियो।

यता इरानी जलसेनाका सेनापति रियर एड्मिरल शाहराम इरानीले बुधबार एक विज्ञप्ति जारी गर्दै अमेरिका र इजरायलसँग युद्धको स्थिति आएमा इरानले “तुरुन्तै र निर्णायक कदम” चाल्ने धम्की दिएका छन् । इरानले अरब सागरबाट हर्मुज जलडमरूलाई बन्द गरिसकेको र कसैले अगाडि बढ्न खोजे कडा कारबाही गर्ने चेतावनी दिएको छ।