अमेरिकी उपनिवेशहरूले बेलायतबाट स्वतन्त्रता घोषणा गरेको साढे दुई शताब्दी पछि राजा जर्ज तृतीयका वंशज राजा चार्ल्स तृतीय सोमबार वासिङ्टन आउने भएका छन् ।

गत शनिबार राष्ट्रपति डोनाल्ड ट्रम्प सहभागी भएको एक भोजमा गोली चलेपछि राजाको यो चार दिने राजकीय भ्रमणको सुरक्षा व्यवस्थालाई लिएर पुनरावलोकन गरिएको थियो। तर, बकिंघम प्यालेस(दरबार)ले राष्ट्रपति र अन्य पाहुनाहरू सुरक्षित रहेकोमा राहत व्यक्त गर्दै भ्रमण पूर्वनिर्धारित योजना अनुसार नै अघि बढ्ने बताएको छ। यो भ्रमण अमेरिकाको २५०औँ वार्षिकोत्सव मनाउन र दुई देशबीचको “विशेष सम्बन्ध” लाई थप बलियो बनाउन आयोजना गरिएको हो।

पछिल्लो समय इरान युद्ध र सैन्य सहायताका विषयमा बेलायती प्रधानमन्त्री कियर स्टार्मर र राष्ट्रपति ट्रम्पबीच केही मतभेद देखिएका छन्। ट्रम्पले बेलायती प्रधानमन्त्रीको आलोचना समेत गरेका थिए। यसका साथै नेटो सहयोगी राष्ट्रहरूसँगको तनावले पनि यो भ्रमणलाई राजनीतिक रूपमा निकै महत्वपूर्ण बनाएको छ।

राजनीतिक तनावका बावजुद राष्ट्रपति ट्रम्पले राजा चार्ल्सको प्रशंसा गरेका छन्। उनले राजालाई आफ्नो “साथी” र “उत्कृष्ट व्यक्ति” भन्दै यो भ्रमणले दुई देशको सम्बन्ध सुधार्न मद्दत गर्ने विश्वास व्यक्त गरेका छन्। ट्रम्पले गत वर्ष बेलायत भ्रमण गर्दा पाएको भव्य स्वागतको पनि स्मरण गरेका छन्।

ह्वाइट हाउसका अनुसार राजा चार्ल्स र रानीको सम्मानमा विशेष राजकीय भोज र विभिन्न कार्यक्रमहरू आयोजना गरिनेछ।