अमेरिकी राष्ट्रपति डोनाल्ड ट्रम्पले इरानमा मृत्युदण्डको सजाय पाएका ८ जना महिला आन्दोलनकारीको ज्यान जोगिएको दाबी गरेका छन् । आफ्नो सामाजिक सञ्जाल ‘ट्रुथ सोसल’ मा लेख्दै ट्रम्पले इरानी नेताहरूलाई गरेको अनुरोधपछि ती महिलाहरूलाई आज राति दिइने भनिएको फाँसी रोकिएको बताएका छन् ।

राष्ट्रपति ट्रम्पका अनुसार तीमध्ये ४ जना महिला तुरुन्तै रिहा हुनेछन् भने बाँकी ४ जनाले एक महिना जेल सजाय काट्नुपर्नेछ। ट्रम्पले इरानी नेताहरूलाई आफ्नो अनुरोध स्वीकार गरेकोमा धन्यवाद दिँदै लेखेका छन् , “यी महिलाहरूको रिहाइ हाम्रो वार्ताको लागि एउटा उत्कृष्ट सुरुवात हुनेछ।”

बिबिसीका अनुसार यद्यपि, इरानको न्यायपालिकाले ती महिलाहरूलाई कहिल्यै मृत्युदण्डको सजाय नतोकिएको र ट्रम्पलाई ‘गलत समाचार’ दिएर झुक्याइएको दाबी गरेको छ।

यसैबीच, समुद्रको महत्त्वपूर्ण बाटो ‘स्ट्रेट अफ हर्मुज’ मा जलडमरुमा तनाव झनै चर्किएको छ। अमेरिकी सेनाले सो क्षेत्रमा कडा घेराबन्दी गर्दै अहिलेसम्म २९ वटा जहाजहरूलाई रोकेको बताएको छ। केही व्यावसायिक जहाजहरूले अमेरिकी घेराबन्दी छलेर भागेको भन्ने समाचारलाई सेनाले ‘गलत’ भनेको छ। अमेरिकी सेनाका अनुसार इरानी झण्डा भएका जहाजहरूलाई नियन्त्रणमा लिएर इरानकै बन्दरगाहमा राखिएको छ।

यसैबीच, इरानले दुईवटा सामान बोक्ने जहाज जफत गरेको विषयमा ह्वाइट हाउसले प्रतिक्रिया दिएको छ। प्रेस सचिव क्यारोलिन लेभिटले भनिन् , इरानको यो कदम युद्धविरामको उल्लंघन होइन, किनकि ती जहाजहरू न त अमेरिकाका थिए, न त इजरायलका।

एकातिर महिलाहरूको ज्यान जोगिएको खबरले विश्वलाई खुसी तुल्याएको छ भने अर्कोतिर समुद्रमा सेनाको सक्रियताले युद्धको खतरा अझै टरेको छैन भन्ने देखाउँछ।