युद्ध होइन संवाद रोजौँ: इरान–अमेरिका तनाव कम गर्न पाकिस्तानको सक्रिय भूमिका

पाकिस्तानले इरान र अमेरिकाबीच जारी तनाव कम गर्न र युद्धविरामको समय थप गर्न विशेष आग्रह गरेको छ। 

मंगलबार पाकिस्तानका परराष्ट्रमन्त्री इसाक दार र अमेरिकी कार्यवाहक राजदूत नताली बेकरबीच भएको महत्त्वपूर्ण भेटवार्तामा यो विषय उठाइएको हो।

पाकिस्तानी परराष्ट्र मन्त्रालयले जारी गरेको विज्ञप्तिअनुसार, परराष्ट्रमन्त्री डारले क्षेत्रमा शान्ति र स्थिरता कायम गर्नका लागि ‘संवाद र कूटनीति’ नै एकमात्र सही बाटो भएको बताएका छन् ।

उनले अमेरिका र इरान दुवै पक्षले युद्धविरामलाई निरन्तरता दिँदै आपसी समस्याहरू कुराकानीमार्फत समाधान गर्नुपर्नेमा जोड दिए ।

जवाफमा अमेरिकी कूटनीतिज्ञ नताली बेकरले क्षेत्रीय शान्ति कायम गर्न र विभिन्न देशहरूबीच संवादको वातावरण बनाउन पाकिस्तानले खेल्दै आएको सकारात्मक भूमिकाको प्रशंसा गरे ।

अहिलेको अवस्थामा इरान र अमेरिकाबीचको तनावले दक्षिण एसियाली क्षेत्रमा पनि असर पर्न सक्ने भएकाले पाकिस्तानले यी दुई देशलाई शान्त रहन र कूटनीतिक माध्यमबाट अघि बढ्न सुझाव दिएको हो ।