इरानको संसदका सभामुख तथा मुख्य शान्ति वार्ताकार मोहम्मद बगेर गालिबाफले अमेरिकासँगको वार्तामा प्रगति भइरहेको बताएका छन्। तर, उनले दुई देशबीच अझै पनि “धेरै खाडल र केही आधारभूत बुँदामा असहमति” बाँकी रहेको जानकारी दिएका छन्।

इरानी सरकारी टेलिभिजन(दूरदर्शन)मा एक घण्टा लामो सम्बोधन गर्दै गालिबाफले हालै इस्लामावादमा भएको वार्ताको चर्चा गरे। उनले केही विषयमा सहमति जुटे पनि केही विषय अझै सुल्झिन बाँकी रहेको र नयाँ प्रस्तावहरूमाथि छलफल भइरहेको बताए। उनका अनुसार दुवै पक्षका “एक वा दुई” यस्ता मुख्य अडानहरू छन् जसमा कसैले पनि सम्झौता गर्न चाहेका छैनन्। यसले गर्दा अन्तिम सहमतिमा पुग्न अझै लामो समय लाग्न सक्ने देखिन्छ।

गालिबाफले अमेरिकासँग विश्वासको वातावरण बनाउन आग्रह गर्दै भने, “अमेरिकी सरकारले इरानी जनताको विश्वास जित्न कदम चाल्नु पर्छ, जुन यो प्रक्रियाको सबैभन्दा महत्त्वपूर्ण पाटो हो।”

एबिसीन्यूजका अनुसार वार्ताको खबरसँगै इरानका सर्वोच्च नेता आयतोल्लाह मोज्ताबा खामेनीले एक कडा विज्ञप्ति जारी गरेका छन्। उनले इरानी नौसेनाले अमेरिका र इजरायललाई “नयाँ पराजय” चखाउन तयार रहेको बताएका छन्। यो चेतावनी इरानले हर्मुज जलसन्धिमा आफ्नो नियन्त्रण पुनः कायम गर्ने घोषणा गरेसँगै आएको हो।

युद्ध सुरु भएदेखि सार्वजनिक रूपमा नदेखिएका खामेनीले आफ्नो बयानमा भनेका छन्, “हाम्रो बहादुर नौसेना शत्रुहरूलाई नयाँ हारको तितो स्वाद चखाउन तयार छ।” उनको यो सन्देश शनिबार इरानी सरकारी टेलिभिजन(दूरदर्शन)मार्फत सार्वजनिक गरिएको थियो।