बेलायती प्रधानमन्त्री कियर स्टारमरले युक्रेन संकटमा आफ्नो सरकारको स्पष्ट अडान प्रस्तुत गरेका छन्। उनले युक्रेनलाई थप सैन्य सहायता दिने घोषणा गर्दै युरोपेली देशहरूलाई पनि “भारी बोझ उठाउन” आग्रह गरेका छन्।

१. युक्रेनलाई सशक्त समर्थन : बेलायतले ५,००० भन्दा बढी अत्याधुनिक हवाई रक्षा क्षेप्यास्त्रहरू प्रदान गर्ने £ १.६ बिलियन पाउण्डको सम्झौता गरेको छ। यी क्षेप्यास्त्रहरू बेलफास्टमा निर्माण हुने भएकाले यसले बेलायती रक्षा उद्योगलाई पनि फाइदा पुर्‍याउनेछ। यो कदमले युक्रेनलाई रुसी क्षेप्यास्त्र आक्रमण रोक्न मद्दत गर्नेछ र बेलायतको सैन्य सहयोग जारी रहने स्पष्ट संकेत दिएको छ।

२. युरोपको जिम्मेवारी वृद्धि : स्टारमर युरोपेली देशहरूलाई युक्रेनको सुरक्षाका लागि अग्रसर हुनुपर्ने बताएका छन्। उनले “इच्छुक राष्ट्रहरूको गठबन्धन” को अवधारणा अघि सारेका छन्, जसअनुसार युक्रेनको रक्षा र सार्वभौमिकता जोगाउन सबै इच्छुक राष्ट्रहरूले एकजुट हुनुपर्छ।

३. बलियो स्थिति बनाएर शान्ति वार्ता : उनले युक्रेनले शक्ति सम्पन्न अवस्थामै शान्ति वार्ता गर्नुपर्छ भन्ने जोड दिएका छन्। उनले युक्रेनको सुरक्षा र क्षेत्रीय अखण्डता सुरक्षित हुने गरी मात्र कुनै पनि शान्ति सम्झौता गर्न सकिने बताएका छन्। बेलायतले युक्रेनलाई कमजोर पार्ने वा रुसी स्वार्थअनुसारको सम्झौता हुन नदिने अडान लिएको देखिन्छ।

४. शान्ति प्रक्रियामा रुसको भूमिका : प्रधानमन्त्री स्टारमरका अनुसार रुस शान्ति वार्तामा सहभागी हुन सक्छ, तर सर्त तोक्ने अधिकार रुससँग हुँदैन। उनले स्पष्ट पार्दै शान्ति प्रक्रिया रुसको पक्षमा नभई युक्रेनको हितमा हुनुपर्छ ।

५. अमेरिका–बेलायत सम्बन्ध : स्टारमरले अमेरिका अझै भरपर्दो साझेदारी भएको बताए। अमेरिकाले हालै युक्रेनलाई सैन्य सहायता दिने विषयमा केही असमझदारी देखाए पनि बेलायत र अमेरिकाबीचको सम्बन्ध बलियो रहेको उनको भनाई छ।