इन्डोनेसियाको सुलावेसी टापुको एक अनाधिकृत सुन खानी क्षेत्रमा पहिरो जाँदा कम्तीमा २३ जनाको ज्यान गएको छ भने दर्जनौ बेपत्ता भएका छन् । हराइरहेका दर्जनौं व्यक्तिको खोजी गर्दा उद्धारकर्मीहरूले मंगलबार भग्नावशेष खनेका छन्।

बोन बोलाङ्गोको दुर्गम र पहाडी गाउँमा आइतबार सयभन्दा बढी गाउँले सुनको टुक्रा खन्ने क्रममा धेरै टन माटो वरपरका पहाडहरू तल झरेर उनीहरूको अस्थायी शिविरहरू पुरेको प्रान्तीय खोज तथा उद्धार कार्यालयका प्रमुख हेरियान्तोले बताए।

उद्धारकर्ताहरूले मंगलबार सुन खानी रहेको बस्तीमा थप शवहरू फेला पारेका छन्।

पहिरोबाट ६६ जना गाउँले भाग्न सफल भएका छन् भने २३ जनालाई उद्धारकर्ताले जिउँदै निकालेका छन् । ८ जना घाइते भएका छन् भने तीन महिला र एक ४ वर्षीय बालकसहित २३ जनाको शव निकालिएको छ । करिब ३५ जना अन्य बेपत्ता रहेको बताइएको छ ।

राष्ट्रिय विपद् व्यवस्थापन निकायका प्रवक्ता अब्दुल मुहारीका अनुसार शनिबारदेखि परेको अविरल वर्षाका कारण पहाडी जिल्ला गोरोन्तालोमा पर्ने बोन बोलाङ्गोका पाँचवटा गाउँमा पहिरो गएको र तटबन्ध भत्किएको छ । झण्डै ३ सय घर प्रभावित भएका छन् भने १ हजारभन्दा बढी मानिस सुरक्षित स्थानमा सरेका छन् ।

भारी वर्षा, अस्तव्यस्त माटो र असहज जङ्गलका कारण उद्धार कार्यमा मृतक र बेपत्ताको खोजीका लागि प्रहरी र सेनासहित २०० भन्दा बढी उद्धारकर्ता परिचालन गरिएको स्थानीय अधिकारीले बताए ।