युक्रेनी राष्ट्रपति भोलोदिमिर जेलेन्स्कीले आफ्नो देशमा पूर्ण मात्रामा रुसले आक्रमण गरेपछि पहिलो पटक स्विडेनको भ्रमणमा गएका छन । उनको भ्रमण हुदै गर्दा यता उत्तरी युक्रेनी शहरमा रुसी क्षेप्यास्त्र आक्रमणमा ५ जनाको मृत्यु भएको छ भने दर्जनौं घाइते भएको एबिसीन्यूजले जनाएको छ ।

स्विडेनी सरकारले जेलेन्स्कीलाई स्टकहोमबाट करिब १२० किलोमिटर (७५ माइल) पश्चिममा रहेको हार्पसन्डमा अधिकारीहरूलाई भेट्ने बताएको छ। उनले स्वीडेनका राजा कार्ल सोह्रौ गुस्ताफ र रानी सिल्भियासँग पनि उक्त क्षेत्रको दरबारमा भेट गर्नेछन्।

स्वीडेनले रूस विरुद्धको युद्धमा युक्रेनलाई हतियार र अन्य सहायताको साथ सहयोग गर्न सैन्य असंलग्नताको लामो समयदेखिको नीति त्यागेको छ । नेटो सदस्यताको लागि आवेदन पनि गरेको तर अझै गठबन्धनमा सामेल हुन पर्खिरहेको एबिसीन्यूजले समाचारमा उल्लेख गरेको छ ।

यसै नामको उत्तरी प्रान्तको क्षेत्रीय राजधानी चेर्निहाइभको शहरको केन्द्रमा शनिबार भएको रुसी क्षेप्यास्त्र आक्रमणमा पाँच जनाको मृत्यु हुनुका साथै अन्य ३७ जना घाइते भएको आन्तरिक मन्त्री इहोर क्लाइमेन्कोले जानकारी दिएका छन ।

जेलेन्स्कीले आक्रमणको निन्दा गरे र उनले नाट्यशाला र विश्वविद्यालय लगायतका भवनमा आक्रमण गरेको बताएका छन्।

“आतंकवादी राज्य भएको छिमेकी भनेको यही हो, जसको विरुद्धमा हामी सारा विश्वलाई एकजुट गर्छौं। एक रूसी क्षेप्यास्त्र शहरको बीचमा, हाम्रो चेर्निहाइभमा प्रहार भयो, ”युक्रेनी राष्ट्रपतिले टेलिग्राममा लेखे।

शनिबार राति, युक्रेनको वायुसेनाले युक्रेनको उत्तरी, मध्य र पश्चिमी क्षेत्रहरूलाई लक्षित गर्ने १७ मध्ये १५ रूसी मानवरहित यानहरु खसालेको बताएको छ।