काठमाडौँ, ४ असार । बाथरोगबारे जनचेतना फैलाउने उद्देश्यले एकदिने नेसनल बाथ रोग सेन्टरले काठमाडौँको सुनधारामा आज तस्बिर प्रदर्शनी आयोजना गरेको छ ।

सेन्टरको तेस्रो वार्षिकोत्सवका अवसरमा आयोजित तस्बिर प्रदर्शनीमा नेपालमा देखिएका विभिन्न बाथ रोगको जानकारी सहितका तस्बिर प्रदर्शन गरिएको छ । बाथ रोगले शरीरमा प्रत्यक्ष असर पार्ने समस्याका बारेमा तस्बिर मार्फत महत्वपूर्ण जानकारी हासिल गर्न सकिने बताइएको छ । सेन्टरले एक साताका लागि निःशुल्क रगत परीक्षण गर्ने पनि बताइएको छ ।

तस्बिर प्रदर्शनीको उद्घाटन कार्यक्रममा सेन्टरका प्रबन्ध निर्देशक रोशन कक्षपतिले नेपालमा करिब ३६ लाख जनालार्ई विभिन्न प्रकारका बाथ रोग भएको जानकारी दिँदै यसको समयमै उपचारका पहँुचमा बिरामी अझै पुग्न नसकेको उल्लेख गर्नुभयो । उहाँले भन्नुभयो—‘‘यो तथ्याङ्कको १० प्रतिशत बिरामीले मात्र उपचारको दायरामा आउन सकेका छन् । नब्बे प्रतिशत बिरामी अझै पनि उपचारको पहुँचमा आउन नसकेको अवस्था छ ।’’
बाथ रोग विशेषज्ञ डा विनीत वैद्यले बाथ मानव शरीरको अस्थिरपञ्जरलाई अस्थिर बनाई दुखाउने रोग भएको बताउनुभयो । उहाँले भन्नुभयो—‘‘शरीरभित्रै उत्पत्ति हुने रोग भएकाले जोर्नी दुखेर र मांसपेसीको कारणले हुने बाथले छाला, आँखा, मुटु र मिर्गाैलालाई असर गर्छ । ’’

बाथ सयौँ किसिमको हुने भएकाले कुन प्रकारको बाथ हो भनी थाहा पाउन रगत परीक्षण गरी त्यसबाट हुने जटिलताबाट बच्न सकिने उहाँको भनाइ छ ।

बाथ जुनसुकै अवस्थामा जुनसुकै उमेरका मानिसलाई हुन सक्छ । बालक, युवा र वृद्धवृद्धा सबैलाई हुने यो रोग नसर्ने रोग दीर्घरोग हो । नेपालमा युरिक एसिडबाट हुने, हाडजोर्नी सुन्निने, दुख्ने, हड्डी खिइने र मेरुदण्डको हड्डी दुख्ने खालका बाथका समस्या बढी देखिन्छ । नेपालमा बालबालिकालाई पनि अत्यधिक मात्रामा बाथ रोगको समस्या देखिएको चिकित्कको भनाइ छ ।

डा कक्षपतिका अनुसार बाथ रोग खास गरी दुखाइबाट सुरु हुन्छ । हाडजोर्नी दुख्ने, सुन्निने, कक्रक्क पर्ने, बिहान उठ्दा हिँड्न समस्या हुने, हात मुठ्ठी पार्न समस्या हुने, घुँडा, कुहिनोजस्ता जोर्नी दुख्ने, ज्वरो आउने, मेरुदण्डको हड्डी सुन्निने र दुख्ने गर्छ । त्यसैगरी छातीका करङ दुख्ने र पिसाब पोल्ने पनि हुन सक्छ । बाथ भएमा गर्भवतीको गर्भ खेर जाने हुन सक्छ । दुखाइ दोहोरिएर हुने जस्ता लक्षण जुनसुकै बाथ भएमा पनि देखिन सक्ने साझा लक्षण हुन् ।

यस्ता समस्या देखिएपछि बाथ रोगका चिकित्सकलाई देखाउनुपर्छ । रगतको र अन्य विशेष जाँच गरेपछि मात्र कुन प्रकारको बाथ हो र कस्तो औषधि चलाउने भन्ने स्पष्ट हुन्छ । बाथ रोग पूर्ण रुपमा निको नभए पनि यसबाट अन्य समस्या नहोस् भन्नाका लागि रोकथाम भने गर्न सकिन्छ