भूकम्पपीडित परिवारको आयआर्जन बढाउनका लागि मध्य दक्षिण पर्वतका आठ गाउँ विकास समितिमा विशेष कार्यक्रम सुरु भएको हो ।

पर्वतका कुर्घा, ठानामौला, भङ्गारा, बालकोट, भोक्सिङ, लुङ्खु, पाखापानी र होस्राङ्गदी गाविसमा कृषकको आयआर्जनका लागि विशेष कार्यक्रम सञ्चालन गर्न लागिएको हो ।

परियोजनाअन्तर्गत आठ गाविसका दुई हजार ६१५ परिवारलाई प्रतिपरिवार रु १५ हजार दिइने र त्यसबाट बाख्रापालन, तरकारीखेती गरी आयआर्जन बढाउने उद्देश्य राखिएको छ । त्यसका लागि रु तीन करोड ९५ लाख ४६ हजार खर्च गरिने जानकारी हेफर इन्टरनेसनलका कार्यक्रम निर्देशक डा तीर्थराज रेग्मीले दिनुभयो ।

भूकम्पबाट पूर्ण र आंशिक क्षति भएका सबै कृषकलाई कार्यक्रमले समेट्ने लक्ष्य राखेको छ । “भूकम्पका कारण पीडित बनेका कृषकको मनोबल बढाउँदै आयआर्जनलाई सक्रिय बनाउन विशेष कार्यक्रम सुरु गरेका हौँ” उहाँले भन्नुभयो– “हेफर नेपालको कार्यक्रम सञ्चालित कार्य क्षेत्रका कृषकलाई मात्रै यसमा समावेश गरिएको छ ।”

कृषकलाई अनुदान र ऋणको रुपमा नभई समूहले नै परिचालन गर्ने गरी निरन्तर आयआर्जनका काममा खर्च बिना ब्याज रकम सहयोग गरिएको उहाँको भनाइ छ । कृषक समूहले उक्त रकम आयआर्जन गरी नाफा कमाएर सहकारी संस्थामा बचत गर्ने र त्यसलाई आयआर्जनकै काममा खर्च गर्ने योजना रहेको उहाँले बताउनुभयो ।

हेफर इन्टरनेसनलको सहयोगमा स्थानीय गैरसरकारी संस्था इन्प्रेड नेपाल, सिड नेपाल र सोडेक नेपालमार्फत यी गाविसमा लामो समयदेखि उद्यम सवलीकरण परियोजनामार्फत बाख्रापालन, तरकारीखेतीमार्फत कृषकलाई आयआर्जन गर्दै आएका छन् ।

वैशाखमा गएको भूकम्पपछि ती गाउँका बाख्रापालक तथा तरकारी उत्पादक कृषक घरबारविहीन भएपछि आयआर्जन कार्यक्रमसमेत प्रभावित हुन नदिन विशेष कार्यक्रम सुरु गरिएको निर्देशक डा रेग्मीले बताउनुभयो ।

कार्यक्रमअन्तर्गत इन्प्रेड नेपालले कुर्घा, लुङ्खु र पाखापानीमा एक हजार ५२९ घर परिवारमा आयआर्जनका लागि रु दुई करोड ३२ लाख २६ हजार, सोर्डेक नेपालले ७६५ परिवारलाई रु एक करोड १५ लाख ८३ हजार र सिड नेपालले ३११ परिवारलाई रु ४७ लाख ३७ हजार खर्च गर्नेछन् ।

यसैगरी हेफर इन्टरनेसनलको सहयोगमा पर्वतका आठ गाविसमा सञ्चालित उद्यम सवलीकरण परियोजनाको जिल्ला परियोजना सल्लाहकार समितिको बैठक शुक्रबार सम्पन्न भएको छ । बैठकले परियोजनामा अहिलेसम्म सञ्चालित कार्यक्रमको समीक्षा गर्दै आगामी कार्यक्रमका बारेमा समेत सुझाव पेस गरेको थियो ।

जिल्ला विकास समितिका कार्यक्रम अधिकृत तुलसीराम शर्माको अध्यक्षतामा भएको कार्यक्रममा इन्प्रेड नेपालका परियोजना संयोजक राजेन्द्र पौडेल, सिड नेपालका कृष्णप्रसाद शर्मा र सोर्डेक नेपालका दिनेशराज सापकोटाले सञ्चालित कार्यक्रम र उपलब्धिका बारेमा जानकारी दिनुभयो ।