मरेका आफन्तको जङ्गलमा गाडिएको चिहानमाथि समाधिस्थल बनाउने उनीहरूको पुख्र्यौली चलनले सालका रुख फस्टाउन छाडेको पशुपति सामुदायिक वनका पूर्वअध्यक्ष रामचन्द्र सुब्बाले बताउनुभयो ।

वनभित्र पक्की चिहान बनाउने प्रचलन राई, लिम्बू, मगर, क्रिस्चियनलगायतले ल्याएका हुन् । पूर्व–पश्चिम महेन्द्र राजमार्ग उत्तर उर्लाबारी–६ को सालबारी सामुदायिक वनको ठूलो भू–भागमा पक्की चिहानले ढाकिएको छ ।

स्थानीय ज्ञानप्रसाद अधिकारीका अनुसार राई–लिम्बू मर्दा सिधै वनतिर लग्ने गरिएको छ । मान्छे मर्दा वनभित्र ठूलो जनसङ्ख्यामा जम्मा भएका मलामीले साना बोटबिरुवा माडेर सखाप पार्ने गरेका छन् ।

पशुपति सामुदायिक वनका पूर्वअध्यक्ष रामचन्द्र सुब्बाका अनुसार पथरी–१ स्थित हरियाली, मनकामना सामुदायिक वन र शनिश्चरे–१ को पशुपति सामुदायिक पनि चिहानले ढाकिसक्न लागेको छ । नयाँ रुखबिरुवा उम्रिने र सप्रिने क्रम घटिरहेको छ ।