इनेप्लिज
२०७२ असार २६ गते १:३५ मा प्रकाशित
इलाम, २६ असार । इलाममा उद्योग दर्ताको सङ्ख्या गत आर्थिक वर्षको तुलनामा ३४ प्रतिशतले वृद्धि भएको छ ।
घरेलु तथा साना उद्योग विकास समितिका अनुसार गत वर्ष २२५ उद्योग दर्ता भएकामा चालु आव २०७१/७२ को हालसम्ममा ३४० उद्योग दर्ता भएका छन् ।
त्यसमध्ये सेवामूलक, उत्पादनमूलक र कृषि तथा वनजन्य उद्योग बढी रहेको कार्यालयका शाखा अधिकृत सुनिल आचार्यले बताउनुभयो । “कृषिअन्तर्गत अदुवा, अलैँची, किबी, डेरी, राइस मिल, पोल्ट्री फार्म र व्यवसाय बढी छन्,” आचार्यले भन्नुभयो ।
व्यावसायिक कृषि तथा व्यापार आयोजना (प्याक्ट) ले लघु उद्यमीलाई उद्योग सञ्चालनका लागि अनुदान दिने भएपछि उद्योग दर्तामा वृद्धि भएको समेत उहाँले बताउनुभयो । लघु उद्योगका रूपमा दर्ता भएका फर्म तथा उद्यमीलाई प्याक्टले रु १० लाखसम्म बिनाधितो अनुदान दिनका लागि गत वर्षनै प्रस्ताव आह्वान गरेपछि घरेलुमा उद्योग दर्ता गर्नेको भीड लागेको थियो ।
कार्यालयले उद्योग र वाणिज्य फर्म दर्ता गरेर रु ४० लाख राजस्वसमेत सङ्कलन गरेको जनाएको छ । रु एकदेखि एक लाखसम्म कारोबार गर्ने उद्योग दर्ता गर्न रु एक हजार १००, रु एक लाखदेखि तीन लाखसम्म रु तीन हजार १००, रु तीन लाखदेखि पाँच लाखसम्म रु छ हजार १५० र रु पाँच लाखदेखि २० लाखसम्मको कारोबार गर्ने उद्योगलाई रु १२ हजार १०० राजस्व लाग्ने घरेलु तथा साना उद्योग विकास समितिले जनाएको छ ।
इलाममा हालसम्ममा दुई हजार ७९१ वटा उद्योग दर्ता भइसकेका छन् । दर्ता भएकामध्ये अधिकांश उद्योग सञ्चालनमा रहेको घरेलु तथा साना उद्योग विकास समितिका प्रमुख नवराज राउतले बताउनुभयो ।
प्रतिक्रिया