विद्यार्थी सङ्ख्या न्यून रहेका विद्यालयलाई नजिकको अर्को विद्यालयमा गाभिएको जिल्ला शिक्षा अधिकारी दिलीपकुमार ठाकुरले जानकारी दिनुभयो । विद्यार्थी सङ्ख्या अत्यन्तै न्यून रहेको र नजिकको दूरीमा अर्को विद्यालय रहेको कारण जिल्ला शिक्षा समितिको बैठकले ६ वटा विद्यालयलाई गाभ्ने निर्णय गरेको उहाँले बताउनुभयो । गाभिएका विद्यालयमध्ये बालउद्यान प्राविलाई जामुनाखर्क उच्च मावि अर्थुङेमा र एक्लेपिपल प्राविलाई विद्यामन्दिर प्राविमा समाहित गराइएको छ ।

त्यस्तै अन्नपूर्ण प्रावि र मालिका प्राविलाई ताकम मावि ताकममा गाभिएको छ भने मण्डली प्राविलाई महेन्द्ररत्न निमावि बरञ्जा र दल राम्जाली प्राविलाई दीपक मावि पात्लेखेतमा गाभिएको जिल्ला शिक्षा कार्यालयले जनाएको छ ।

‘‘पर्यटकीय बस्ती घोरेपानीमा रहेको पुनहिल प्राविमा कोही पनि विद्यार्थी देखिएनन्, एकजना पनि विद्यार्थी नरहेको कारण उक्त विद्यालय बन्द गरिएको छ”, जिल्ला शिक्षा अधिकारी ठाकुरले भन्नुभयो ।” विद्यालय एकीकरण भएका विद्यालयमा कार्यरत शिक्षकको दरबन्दी तत्कालको लागि जिल्ला शिक्षा समितिको जगेडामा राखेर आवश्यक परेका विद्यालयमा खटाउने निर्णय भएको जिशिअ ठाकुरले बताउनुभयो ।

विद्यालय गाभ्ने अभियानसँगै २४४ वटा सामुदायिक विद्यालय रहेको जिल्लामा अहिले सङ्ख्या घटेर २३२ भएका छन् । यस अगाडि पनि जिल्लाका पाँचवटा विद्यालयलाई नजिकको अर्को विद्यालयमा गाभिएको थियो ।

बसाइँसराइको कारण जिल्लाको ग्रामीण भेगमा बसोबास पातलो हुँदै जाँदा विद्यालयमा विद्यार्थी अभाव देखिन थालेको छ । ग्रामीण भेगका विद्यालयमा विद्यार्थी अभाव देखिएसँगै सहरबजारका विद्यालयमा भने विद्यार्थीको चाप बढेको पाइएको छ ।