सोमबार, मंसिर १५ २०७७
काठमाडौं ०४:४१
वासिङटन डिसी 17:56

लामो समयदेखि अवरुद्ध एक्स–रे मेसिन सञ्चालनमा

इनेप्लिज २०७२ वैशाख २८ गते ४:४५ मा प्रकाशित

24_05_2014-23etw15-c-2खोटाङ, २८ वैशाख । विद्युत् भोल्टेज नपुगेपछि विगत लामो समयदेखि बन्द रहेको जिल्ला अस्पताल खोटाङको एक्स–रे मेसिन सञ्चालनमा ल्याइएको छ ।

नेपाल विद्युत् प्राधिकरणले ५० केभीएको विद्युत ट्रान्सफर्मर जडान गरिदिएपछि विगत दुई वर्षदेखि बन्द रहेको एक्स–रे मेसिन हालै सञ्चालनमा ल्याइएको हो ।

मेसिन सञ्चालनमा आएसँगै अहिले दैनिक ४०/५० जना बिरामीले एक्स–रे सेवा लिन थालेका अस्पतालका प्रमुख चिकित्सक माधव लम्सालले बताउनुभयो । उहाँले भन्नुभयो–“यसअघि विद्युत् अभावमा मेसिन चलाउन नसक्दा एक्स–रे गर्न आउने बिरामीलाई अन्यत्र रेफर गर्नुपर्ने बाध्यता थियो, प्राधिकरणले ढिलै भए पनि मेसिनलाई आवश्यक पर्ने ट्रान्सफर्मर जडान गरिदिएपछि त्यो समस्या समाधान भएको छ ।”

अस्पतालमा आउने बिरामीको समस्यालाई मध्यनजर गर्दै चार लाख बराबरको ५० केभिएको ट्रान्सफर्मर उपलब्ध गराइएको विद्युत् प्राधिकरण शाखा कार्यालय खोटाङका प्रमुख पुरुषोतम रेग्मीले बताउनुभयो ।

उक्त डिजिटल एक्स–रे मेसिन सञ्चालनमा आएपछि स्वास्थ्य उपचारमा सहज भएको अस्पतालले जनाएको छ । तर २०४४ सालमा स्थापना भएको जिल्ला अस्पतालमा दक्ष जनशक्ति तथा भौतिक सुविधा नहुँदा जिल्लाका अधिकांश बिरामी उपचारका लागि बाहिर जानुपर्ने अवस्था छ ।

प्रतिक्रिया