मोरङ व्यापार सङ्घका अनुसार उत्पादनको ७० प्रतिशत भारतमा बजार रहेको देशकै ठूलो जस्ता र कर्कटपाता आरती स्ट्रिप्स, जुट, चाउचाउ, प्लास्टिक, बिस्कुट, आइरन र वायर उद्योग बन्दले बढी मारमा परेका छन् ।

मोरङ सुनसरी करिडोरमा भारत तथा तेस्रो मुलुकतर्फ निकासी गर्ने उद्योगको सङ्ख्या दुई दर्जनभन्दा बढी छन् । बन्दले मुलुकको समग्र अर्थतन्त्रमा नराम्रो असर पारेको मोरङ व्यापार सङ्घका वरिष्ठ उपाध्यक्ष राजेन्द्र राउतको भनाइ छ ।

विकल्प खोजेर विरोधका अरू कार्यक्रम गर्न सकिने अवस्था हुँदाहुँदै आमहड्तालजस्तो कार्यक्रम गर्नु देशकै लागि दुर्भाग्य भएको मोरङका उद्योगीको भनाइ छ । करिडोरका उद्योगमा ५० हजारभन्दा बढी नेपालीले रोजगारी पाइरहेका छन् ।

मोरङ व्यापार सङ्घका अनुसार उद्योगले विभिन्न मुलुकबाट आयात गरेर ल्याएका करोडौँ मूल्य बराबरका भन्सारसम्म ल्याइएका औद्योगिक कच्चापदार्थको ढुवानी गरेर उद्योगसम्म ल्याउने अवस्था नभएपछि उद्योगीले भन्सारमा शुल्कसमेत तिर्नुपरेको छ ।

बन्द अवधिभर बैंकको ब्याज, मजदुर ज्यालालगायत शुल्कले उद्योगलाई थप धरासायी बनाएको मोरङ व्यापार सङ्घका वरिष्ठ उपाध्यक्ष राजेन्द्र राउतको भनाइ छ ।

देशकै औद्योगिक राजधानी नामले चिनिने करिडोर क्षेत्रमा सानाठूला गरी ६०० उद्योग सञ्चालनमा छन् ।