उक्त क्षेत्रमा पर्याप्त पूर्वाधार जुटाउन सरकारसँग मेला मूल व्यवस्थापन समितिले आग्रह गरेको छ । ललितपुरकै ऐतिहासिक एवम् पुरातात्विक महत्व बोकेको परम्परागत मेलाका बारेमा जानकारी गराउदै सुरक्षा, यातायात, खानेपानी, पार्किङ, सूचनालगायत स्नान गर्ने कुण्ड मर्मतका लागि सरकारसमक्ष आर्थिक सहयोगको अपिल गरिएको हो ।

समितिले चार करोड ५२ लाख रुपैयाँको अनुदान रकम निकासा गरिदिन जिविस ललितपुरको सिफारिसमा संस्कृति ,पर्यटन तथा नागरिक उडड्यन मन्त्रालयमा माग गरिसकेको पत्रकारसम्मेलनमा जानकारी दिएको छ । गोदावरीमा २०७२ सालको भदौ महिनाभरि १२ वर्षमा हुन लागेको मेलामा करिब रु ६० लाखको हाराहारीमा आगन्तुक त्यहाँ आउने समितिको अनुमान छ ।

पर्यटक जो कसैले पनि गोदावरी मेलाको अवलोकन गर्ने भएकाले मानवीय चापलाई मध्यनजर गर्दै विभिन्न समस्या हल गर्नुपर्ने देखिएको समितिका संयोजक प्रमुख जिल्ला अधिकारी यादवप्रसाद कोइरालाले बताउनुभयो । मेलास्थलसम्म आउने मूल सडकलाई मर्मत गर्नुपर्ने, वैकल्पिक मार्गहरु गोदावरी–सिद्धिपुर, टौखेल–झरुवाराशी–धापाखेल हुँदै सातदोबाटो, गोदावरी– बडिखेल–लेले सडकको स्तरोन्नति गर्ने आवश्यकता देखिएको पत्रकारसम्मेलनमा जानकारी दिनुभयो ।

तीर्थालुका लागि ५० अस्थायी र तीनवटा स्थायी शौचालय तथा गोदावरी स्नानकुण्ड वरपरका भौतिक संरचनाको पुनः निर्माण गर्नुपर्ने आवश्यकता रहेको समितिका सहसंयोजक मधुसूदन पौडेलले बताउनुभयो । प्रमुख जिल्ला अधिकारी यादव कोइरालाको संयोजकत्वमा एक हजार एक सदस्यीय मेला ब्यवस्थापन समिति गठन गरिएको छ ।