इनेप्लिज
२०७१ फागुन २८ गते १४:४६ मा प्रकाशित
रत्ननगर (चितवन), २८ फागुन । चितवनमा स्वाइनफ्लुका बिरामी बढेपछि आज यहाँ हेल्पडेस्क स्थापना भएको छ ।
भरतपुर अस्पतालमा आज स्थापना भएको हेल्पडेस्कको अस्पतालका मेडिकल सुपरिटेन्डेन्ट विजय पौडेलले उद्घाटन गर्नुभयो ।
आज मात्रै जिल्लाका २७ बिरामीमा स्वाइनफ्लु पुष्टि भएपछि सर्वसाधारणको सहजताका लागि हेल्प डेस्क स्थापना गरिएको अस्पतालले जनाएको छ । यसअघि हिजोसम्म १० जनामा सवाइनफ्लु लागेको पुष्टि भएको थियो ।
स्वाइनफ्लुका विरामीको उपचारका लागि डा राजु बस्नेतको नेतृत्वमा रेस्पोन्स टिम समेत बनाइएको छ । जसमा डा भोजराज अधिकारीलगायत रहेका छन् ।
अहिले आइसोलेसन वार्डमा दुईजना स्वाइनफ्लुका बिरामीको उपचार जारी रहेको अस्पतालले जनाएको छ ।
जनस्वास्थ्य कार्यालय चितवनका किट नियन्त्रण निरीक्षक रामकुमार केसीका अनुसार १६२ जनाको परीक्षणमा आजसम्म २७ जना स्वाइनफ्लु लागेको पाइएको हो ।
सबै उपचार निःशुल्क हुने भएकाले सर्वसाधारणलाई उपचारका लागि नहिचकिचाउन भरतपुर अस्पतालले अनुरोध गरेको छ ।
प्रतिक्रिया