बेपत्ता हुनेमा ३० वर्षीय याम बुढा, ३२ वर्षीय रुद्र बुढा, २४ वर्षीय रामकुमार बुढा, १९ वर्षीय दीर्घ बुढा, २२ वर्षीय कान्छा महतारा र २८ वर्षीय धीरेन्द्र बुढा रहेको जिल्ला प्रहरी कार्यालयले जनाएको छ । बिहानै घरबाट रुकुममा रहेका आफन्त भेट्न जान्छौँ भनेर रुपपाटन लेकको बाटो हुँदै निस्केका उनीहरुको अहिलेसम्म पनि केही खबर नआएको आफन्तको भनाइ छ ।

बेपत्ता भएको १५ दिन बितिसक्दा पनि अहिलेसम्म कुनै पनि निकायबाट उद्धार हुनसकेको छैन । उनीहरु निस्किएलगत्तै भारी वर्षा र हिमपात परेकाले उनीहरु जीवित नभएको अधिकांश सर्वसाधारण बताउँछन् ।

सो ठाउँमा आठदेखि १० फिसम्म हिमपात भएकाले उक्त ठाउँमा मान्छे जाने अवस्था नभएकाले उद्धारका लागि आफन्तजनले सम्बन्धित निकायमा माग गरेका छन् । उनीहरु रुकुममा रहेका आफन्तकहाँ पनि नपुगेको बताइएको छ । छिमेकी गाउँका मानिसले भने उनीहरु सिकार खेल्न लेकतिर गएको बताएका छन् ।