चेलीबेटी तथा मानव बेचबिखन विरुद्ध कार्यरत संस्था केआई नेपाल रुपन्देहीले सुनौली नाका हुँदै भारततर्फ लैजाँदै गरिएका पाँचजना नेपाली युवतीको बेलहिया सीमा क्षेत्रबाट उद्धार गरेको जनाएको छ । युवतीलाई निजी नम्बरको जिपमा राखेर सिमाना पार गराउन लागिएको थियो ।

आफ्नो घर कोलकता र हाल काठमाडौँमा बस्दै आएको बताउने मनोज सेट्ठीले उनीहरुलाई प्रलोभनमा पारी भारततर्फ लैजाँदै गरेको अवस्थामा उद्धार गरिएको केआई नेपालकी प्रमुख तारा सापकोटाले बताउनुभयो ।

उद्धार गरिएका युवतीमध्ये दुई चितवनका, एक दाङका, सिन्धुपाल्चोक र भारत सिक्किम घर भएर लामो समयदेखि काठमाडौँ बस्दै आएका एक÷एक जना छन् ।

बेलहिया नाकामा रहेको केआई नेपालको निगरानी केन्द्रमा कार्यरत महिला कर्मचारीले उक्त जिपमा नेपाली युवती देखेपछि रोकेर सोधपुछ गरेपछि यथार्थ कुरा खुल्न आएको प्रमुख सापकोटाले जानकारी दिनुभयो ।

भारत लैजाँदै गरेका मनोज भने युवतीलाई सोधपुछ गर्न थालेपछि फरार भएको उहाँले बताउनुभयो ।