प्रमुख जिल्ला अधिकारी शम्भुप्रसाद रेग्मीकाअनुसार असिना पीडित परिवारलाई रु तीन करोड ५२ लाख ४७ हजार राहत सहयोग आएको छ ।

रु दुई करोड कृषि मन्त्रालयबाट, रु एक करोड २५ लाख आपूर्ति मन्त्रालयबाट, रु २५ लाख प्रधानमन्त्री राहतकोषबाट, रु दुई लाख ४७ हजार जिल्लामा कार्यरत कर्मचारी, व्यापारी र गैरसरकारी संस्थाबाट राहत उपलब्ध भएको प्रमुख जिल्ला अधिकारी रेग्मीले बताउनुभयो ।

जिल्ला कृषि विकास कार्यालयको प्राविधिक टोलीले गएको कार्तिक महिनामा सम्बन्धित गाविसमै गई मूल्याङ्कन गरी जिल्ला प्रशासन कार्यालयमा विवरण पेश गरेको थियो । सोही आधारमा जिल्लाका ८ वटा गाविसका असिना पीडत किसानलाई राहत उपलब्ध गराउने प्रजिअ अधिकारीले बताउनुभयो ।

उहाँका अनुसार केन्द्र तथा जिल्लाबाट प्राप्त राहत श्रीकोट गाविसलाई ४० प्रतिशत, सेरीलाई १७, श्रीनगरलाई १२, कार्कीवाडालाई १२, गम्थालाई ८, कोटडाँडालाई ७, धैनकोट र खमा गाविसका २ प्रतिशतले राहत पाउने छन् ।

‘‘राहत स्वरुप प्राप्त हुने चामल, पीठो र बीउ बिजन एक महिनाभित्र पीडित परिवारलाई वितरण गरिसक्छौं’’ प्रजिअ रेग्मी बताउनुहुन्छ ।

गएको कार्तिकमा भाइटीकाका दिन ओको असिनापानीले जिल्लाका आठ गाविसमा रु १३ करोड भन्दा बढी क्षति भएको जिल्ला कृषि विकास कार्यालयले जनाएको छ ।