राजविराज, ९ फागुन । मधेसी जनअधिकार फोरम नेपालका अध्यक्ष उपेन्द्र यादवले बहुमतको दम्भमा वर्तमान सरकारले जनविरोधी संविधान बनाए त्यो आफूहरुलाई मान्य नहुने बताउनुभएको छ ।

तीस दलीय मोर्चाद्वारा आज राजविराजमा आयोजित विरोधसभालाई सम्बोधन गर्दै उहाँले नेपाली काँग्रेस र नेकपा (एमाले) सँग दुईतिहाई बहुमतबाट संविधान निर्माण गर्ने ताकत नरहेको दाबी गर्नुभयो । उहाँले हिम्मत भए बहुमतबाट संविधान बनाएर देखाउन चुनौतीसमेत दिनुभयो ।

वार्ता र संवादका लागि आफूहरु तयार रहेको स्पष्ट पार्दै अध्यक्ष यादवले भन्नुभयो, “विगतमा गरिएका सहमति, सम्झौता र समझदारीको के हुने हो, संविधानमा राखिन्छ कि राखिँदैन त्यो कुरा पहिला नै स्पष्ट हुनुपर्छ ।”

पहिले गरिएका सहमति÷सम्झौताका आधारमा संविधान बनाउने, सभामुखले चालेको कदम फिर्ता, सहमतिको आधारमा संविधान बनाउने प्रतिबद्धता आएमा आफूहरु वार्तामा बस्ने उहाँले बताउनुभयो । “पछिल्लो समयमा गरिएका सहमति÷सम्झौता लागू गरिँदैन भने वार्ताबाट हुने सहमति लागू गरिन्छ भन्ने कुराको के विश्वास ?”–उहाँले प्रतिप्रश्न गर्दै भन्नुभयो ।

विरोध सभालाई सम्बोधन गर्दै एकीकृत नेकपा (माओवादी)का पोलिटब्यूरो सदस्य रामचन्द्र झाले मधेसको गौरवमय इतिहासलाई धुमिल पार्ने षडयन्त्र भइरहेको बताउँदै काँग्रेस र एमालेले सदैव मधेससँग बेइमानी गरिरहेको आरोप लगाउनुभयो ।

मधेसी जनअधिकार फोरम (गणतान्त्रिक) का अध्यक्ष राजकिशोर यादवले सङ्कटग्रस्त मुलुकलाई निकास दिन सहमतिमा संविधान बनाउनु आवश्यक रहेको बताउनुभयो ।

सद्भावना पार्टीका वरिष्ठ उपाध्यक्ष नवलकिशोर साहले बहुमतको दम्भमा संविधान बनाए मुलुकका लागि दुर्भाग्य हुने बताउनुभयो ।

मधेसी जनअधिकार फोरम (लोकतान्त्रिक) का महासचिव मृगेन्द्रकुमार सिंह यादवले बहुमतको बलमा संविधान बनाइए मधेस र मधेसी जनताले स्वीकार नगर्ने बताउनुभयो ।