सोनाम ल्होसारमा राष्ट्रपतिको शुभकामना

काठमाडौँ, ७ माघ । राष्ट्रपति डा रामवरण यादवले सोनाम ल्होसारका अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइमा सुख, शान्ति र समृद्धिको कामना गर्नुभएको छ ।

उहाँले आज एक सन्देश दिँदै विशेष गरी तामाङ समुदायले आफ्नो परम्पराअनुसार मनाउँदै आइरहेको सोनाम ल्होसारले आफ्नो समुदायको पहिचानलाई मजबुत बनाउन तथा हिमाल, पहाड र तराईमा बस्ने हामी नेपालीबीच एकताको सूत्रमा बाँधी आपसी बन्धुत्वको भावना बढाउने कार्यमा सहयोग पुग्ने विश्वास व्यक्त गर्नुभएको छ ।

राष्ट्रपति डा यादवले देशका सबै चाडपर्व, भाषा, वेषभूषा, संस्कृति र परम्पराको संरक्षण र संवद्र्धन गर्न सोनाम ल्होसारजस्ता पर्वले हामी सबैमा प्रेरणा प्रदान गरोस् भन्ने कामना पनि गर्नुभएको छ ।