अमेरिकी राष्ट्रपति डोनाल्ड ट्रम्पले सोमबार कार्यकारी आदेशमा हस्ताक्षर गर्दै सिरियामाथिको अमेरिकी प्रतिबन्ध कार्यक्रम पूर्णरूपमा अन्त्य गर्ने घोषणा गर्ने भएका छन्। यस कदमले सिरियालाई स्थायित्व र शान्तिको मार्गमा अघि बढाउन सहयोग गर्ने विश्वास राष्ट्रपति ट्रम्पको रहेको ह्वाइट हाउसकी छापा सचिव क्यारोलिन लेभिटले जानकारी दिइन्।

यसअघि मे महिनामा मध्यपूर्व भ्रमणको क्रममा ट्रम्पले सबै प्रतिबन्ध हटाउने घोषणा गरेका थिए। त्यही भ्रमणमा ट्रम्पले सिरियाका नयाँ अन्तरिम राष्ट्रपति अहमद अल-शरासँग भेट गरेका थिए। मार्चमा शराले अन्तरिम सरकार घोषणा गरेका थिए । विपक्षी शक्तिको आक्रमणले असद शासन ढलेको थियो।

लेभिटका अनुसार भूतपूर्व राष्ट्रपति बशर अल-असद, मानवअधिकार उल्लङ्घनकर्ता, लागू औषध कारोबारी, रसायनिक हतियारसँग सम्बन्धित व्यक्ति, आइएसआइएस र ईरानी प्रतिनिधिमाथिको प्रतिबन्ध भने कायम रहनेछ।

अमेरिकी वित्त विभागले केही प्रतिबन्धहरू हटाउने औपचारिक मार्गनिर्देशन जारी गरिसकेको छ, जसमा बैंक, बिमानसेवा र अनुमोदित पूर्वाधार परियोजनाहरू समावेश छन्।

ट्रम्पले प्रतिबद्धता अनुसार लगानी बढाउने उद्देश्यले आर्थिक स्वीकृतिहरू कार्यान्वयनमा ल्याएको वित्त मन्त्री स्कट बेसन्टले बताए। सिरियाली अन्तरिम सरकारले प्रतिबन्धका कारण तलब दिन नसकिएको, शहर पुनर्निर्माण रोकिएको र स्वास्थ्य सेवा ध्वस्त भएको बताउँदै आएको छ।

टर्की र साउदी अरेबियाले नयाँ सरकारसँग सम्बन्ध सुधार्न समर्थन जनाएका छन्। साउदीले सिरियाको ऋण भुक्तानी गर्न समेत तयारी देखाएको छ।

यो आदेशले सिरियालाई युद्धपछिको पुनर्निर्माण र क्षेत्रीय सम्बन्ध सुधारका लागि नयाँ ढोका खोल्ने अपेक्षा गरिएको छ।