इरानका विदेशमन्त्री अब्बास अराक्चीले शुक्रबार स्विट्जरल्यान्डको जेनेभामा तीन युरोपेली देशहरूसँग वार्ता गर्ने इरानको सरकारी समाचार निकाय इर्नाले जनाएको छ।

इर्नाले अराक्चीलाई उद्धृत गर्दै जनाएअनुसार यो बैठक इरानका विदेशमन्त्री र बेलायत, फ्रान्स तथा जर्मनीका समकक्षीहरूका साथै युरोपेली संघका विदेश नीति प्रमुख काजा कलासबीच हुनेछ। अराक्चीले इर्नालाई बताए अनुसार यो बैठक युरोपेली देशहरूको अनुरोधमा हुन लागेको हो।

यसैबीच, बेलायतका विदेश सचिव डेभिड लामी मध्यपूर्वको स्थितिको बारेमा अमेरिकी विदेशमन्त्री मार्को रुबियोसँग छलफल गर्न वासिङ्टन डीसी जाँदै गरेको बेलायतको विदेश मन्त्रालयले बिहीबार सिएनएनलाई जानकारी दिएको छ।

अमेरिकी राष्ट्रपति डोनाल्ड ट्रम्पले इजरायलको इरानसँगको द्वन्द्वमा प्रवेश गर्नेबारे विचार गरिरहेका बेला बेलायतको विदेश मन्त्रालयले यो बैठकले “हाम्रो सबैभन्दा ठूलो सहयोगीसँग निरन्तर संलग्नता” लाई अनुमति दिने बताएको छ।