युक्रेनले अमेरिकासँग एक ऐतिहासिक सम्झौता गरेको छ, जसअनुसार अमेरिकाले युक्रेनका दुर्लभ खनिज स्रोतहरूमा पहुँच प्राप्त गर्नेछ। 

रूससँग तीन वर्षदेखि चलिरहेको युद्ध अन्त्य गर्ने प्रयासस्वरूप युक्रेन ट्रम्प प्रशासनसँग सहकार्य गर्दै आएको छ।

बुधबार युक्रेनी अर्थमन्त्री तथा उपप्रधानमन्त्री युलिया स्विरिदेन्को वाशिङ्टन डी.सी. पुगेर यो सम्झौताको अन्तिम रूप दिन सहयोग पुर्‍याइन्।

“युक्रेनी सरकारको तर्फबाट मैले संयुक्त राज्य अमेरिका–युक्रेन पुनर्निर्माण लगानी कोष स्थापनासम्बन्धी सम्झौतामा हस्ताक्षर गरेकी छु। अब हामी अमेरिकासँग मिलेर यस्तो कोष बनाउँदैछौं, जसले युक्रेनमा विश्वव्यापी लगानी आकर्षित गर्नेछ,” उनले आफ्नो आधिकारिक एक्स खातामा लेखिन्।

यो सम्झौता केवल खनिजमा सीमित छैन । यसले युक्रेनको युद्धपछिको पुनर्निर्माण र आर्थिक पुनरुत्थानमा अमेरिका र अन्तर्राष्ट्रिय लगानीकर्ताहरूलाई सहभागी गराउनेछ।

ट्रम्प प्रशासनसँगको सहकार्यले युक्रेन–अमेरिका सम्बन्धलाई नयाँ उचाइमा पुर्‍याएको जनाइएको छ। युद्ध अन्त्यका लागि कूटनीतिक मार्ग खोज्दै गर्दा, युक्रेनले आर्थिक क्षेत्रमा विदेशी साझेदारहरूलाई आकर्षित गर्दै आफूलाई दिगो रूपमा पुनः निर्माण गर्ने रणनीति अवलम्बन गरिरहेको देखिन्छ।

यस सम्झौताले युक्रेनको रणनीतिक स्रोतहरूमा अमेरिकी पहुँच सुनिश्चित गर्नुका साथै पश्चिमी सहयोगमा आधारित नयाँ युगको संकेत दिएको छ।