युक्रेनले रुसलाई युद्ध रोक्न बाध्य पार्ने उद्देश्यले आफ्नो दबाब अभियानलाई तीव्र बनाएको छ। यसै क्रममा युक्रेनी सेनाले रुसको उफा शहरमा रहेको एउटा ठुलो तेल प्रशोधन कारखानामा शक्तिशाली आक्रमण गरेको छ। युक्रेनका राष्ट्रपति भोलोदिमिर जेलेन्स्कीले बुधबार यस आक्रमणको पुष्टि गरेका हुन्।

आक्रमणबारे सामाजिक सञ्जालमा लेख्दै राष्ट्रपति जेलेन्स्कीले भनेका छन्, “रुसले हामीविरुद्ध जे-जति गरिरहेको छ, यो त्यसको एकदमै उचित र न्यायपूर्ण जवाफ हो। संसारलाई शान्ति चाहिएको छ, र ,रुसी नेतृत्वले यो कुरा बेलैमा बुझ्नुपर्छ। रुसले अब यो युद्ध तुरुन्तै बन्द गर्नुपर्छ।”

रुसको रक्षा मन्त्रालयले यस तेल कारखानाको आक्रमणबारे बुधबार सार्वजनिक रूपमा कुनै ठुलो टिप्पणी गरेको छैन। तर, उनीहरूले टेलिग्राम मार्फत एउटा सन्देश दिँदै आफ्ना सैनिकहरूले रातभरिमा युक्रेनका कम्तीमा १७९ वटा मानव रहित यान (ड्रोन)हरू आकाशमै खसालिदिएको वा नष्ट गरिदिएको दाबी गरेका छन्।

यो तेल कारखाना युद्ध भइरहेको मुख्य सिमाना (फ्रन्टलाइन ) बाट १,३०० किलोमिटर (लगभग ८०० माइल) भन्दा बढी टाढा रुसको भित्री भागमा अवस्थित छ। राष्ट्रपति जेलेन्स्कीका अनुसार यो कारखाना रुसकै सबैभन्दा धेरै गाडी तथा यन्त्रमा हालिने मोबिल वा लुब्रिकेन्ट्स उत्पादन गर्ने ठाउँहरूमध्ये एक हो।

एबिसीन्यूजले जनाए अनुसार यति मात्र होइन, युक्रेनले सोही रात रुसको पेन्जा क्षेत्रमा रहेको एउटा अर्को ठुलो सैनिक कारखानामा पनि आकाशबाट हमला गरेको छ। यो यस्तो ठाउँ हो जहाँ रुसले आफ्ना खतरनाक मिसाइल (हवाई हतियार) का पाटपुर्जाहरू विकास र उत्पादन गर्ने गर्दछ।

युक्रेनी सेनाको मुख्यालयका अनुसार उनीहरूको मुख्य निसाना रुसको अन्तरिक्ष र हवाई प्रविधि सम्बन्धी ठुलो संस्था ‘एनआईआईएफआई’ थियो। युक्रेनले दाबी गरे अनुसार यो कारखानामा रुसी पानीजहाज र लामो दुरीको क्षेप्यास्त्र (ब्यालिस्टिक मिसाइल)का लागि आवश्यक पर्ने सेन्सरहरू र भूउपग्रहका पाटपुर्जाहरू बनाइन्थ्यो।

आक्रमणपछि उक्त सैन्य उद्योगमा ठुलो आगलागी भएको र धुवाँको मुस्लो उडेको सामाजिक सञ्जालमा जानकारी दिइएको छ।

युक्रेनी सेनाका अनुसार यो कारखाना रुसको अन्तरिक्ष, हवाई उड्डयन र सेनाका अत्याधुनिक उपकरण बनाउने सबैभन्दा मुख्य केन्द्र हो।