नेपालका परराष्ट्रमन्त्री शिशिर खनाल छिमेकी देश चीनको औपचारिक भ्रमणमा जाने भएका छन् । चिनियाँ कम्युनिस्ट पार्टीका केन्द्रीय सदस्य तथा चीनका विदेशमन्त्री वाङ यीको विशेष निमन्त्रणामा उनि आगामी असार ३ देखि ६ गते अर्थात् जुन १४ देखि १७, २०२६ सम्म चीन जान लागेका हुन् ।

भ्रमणका क्रममा परराष्ट्रमन्त्री खनालले चीनको राजधानी बेइजिङमा आफ्ना चिनियाँ समकक्षी वाङ यीसँग दुई देशबीचको आपसी सम्बन्धका बारेमा महत्त्वपूर्ण छलफल गर्ने छन् । यस बैठकमा नेपाल र चीनबीचको पुरानो मित्रतालाई अझ कसरी बलियो बनाउने र विकासका काममा कसरी सहकार्य बढाउने भन्ने विषयमा कुराकानी हुनेछ । यसका साथै उनले चीनका अन्य उच्च पदस्थ नेताहरूसँग पनि शिष्टाचार भेटघाट गर्ने कार्यक्रम रहेको छ ।

यो भ्रमण केवल राजनीतिक भेटघाटमा मात्र सीमित हुने छैन, यसले नेपालको आर्थिक विकासमा पनि ठूलो मद्दत पुर्‍याउने विश्वास गरिएको छ । बेइजिङस्थित नेपाली दूतावासले आयोजना गर्ने ‘लगानी सम्मेलन’ मा परराष्ट्रमन्त्री सहभागी हुनेछन् ।

यस सम्मेलनको मुख्य उद्देश्य चिनियाँ व्यापारी र उद्योगीहरूलाई नेपालमा पैसा लगानी गर्न र नयाँ उद्योगहरू खोल्न प्रोत्साहन गर्नु हो । मन्त्री खनालले त्यहाँका ठूला व्यवसायीहरूसँग सिधै कुराकानी गरी नेपालमा लगानीका सम्भावनाबारे जानकारी दिने छन् ।

यसका साथै, चिनियाँ भूमिमा रहेका नेपाली समुदायसँग भेटघाट गर्नका लागि नेपाली दूतावासले एउटा विशेष स्वागत समारोहको आयोजना गर्नेछ, जहाँ मन्त्री खनालले त्यहाँ बसोबास गरिरहेका नेपालीहरूसँग अन्तर्क्रिया गर्ने छन् ।

आफ्नो चार दिने फलदायी भ्रमण र महत्त्वपूर्ण भेटघाटहरू सम्पन्न गरी परराष्ट्रमन्त्री शिशिर खनाल आगामी असार ६ गते अर्थात् जुन १७ मा काठमाडौँ फर्कने छन् ।